Umkringd listakokkum

Frétta- og dagskrárgerðar¬maðurinn Helga Arnardóttir heldur í fyrsta skipti jól með lítinn hvítvoðung upp á arminn en dóttir hennar, Margrét Júlía Reynisdóttir, kom í heiminn 13. nóvember síðastliðinn. Jólin í ár verða því frábrugðin fyrri jólum.

Á meðgöngunni vann Helga að gerð þáttanna Óupplýst lögreglumál, sem sýndir eru á Stöð 2, og var því með hugann nokkuð fjarri fæðingar- og ungbarnastússi. Nú sér dóttirin hins vegar til þess að Helga hugsar ekki um nokkuð annað og nýtur tímans í botn. „Hún er að taka vaxtarkipp núna og hangir bókstaflega á mér. Ég er farin að líta á það sem stórkostleg forréttindi að komast í sturtu og kann orðið dagskrána á FoodNetwork utan að,“ segir Helga. Hún ætlar að verja aðfangadegi með móður sinni, Margréti Ákadóttur, og sambýlismanninum, Reyni Erni Þrastarsyni. „Á mínu heimili hefur alltaf verið elduð gæs og hefur Reynir, sem er matreiðslumaður, glaður gengið inn í þá hefð. Hann skaut sína bráð í haust og mun elda hana eftir kúnstarinnar reglum. Í forrétt erum við með humar í raspi sem er borinn fram með franskbrauði og kokteilsósu með þeyttum rjóma og svo endum við á ris à l´amande.“

Við taka svo fjölskylduboð í röðum sem enda hjá Ingunni, systur Helgu, á gamlárskvöld þar sem borðin svigna undan alls kyns smáréttum. „Ég er umkringd listakokkum sem kemur sér einstaklega vel þar sem ég kann varla að sjóða pylsur.“ Helga segist þó nokkuð lunkin við að baka. „Ég er ekki svona dass-kona en kann að fara eftir uppskriftum. Ég hafði því hugsað mér að skella í smákökur ef ég get mögulega lagt barnið frá mér. Ég var meira að segja með háleitar hugmyndir um að gera franskar makkar­ónur en þá þyrfti ég nú örugglega að athuga með pössun enda nánast um dagsverk að ræða.“

Þáttaröð Helgu, Óupplýst lögreglumál, hóf göngu sína sunnudaginn 24. nóvember. Sama dag og dótturinni var gefið nafn. „Margrét í höfuðið á móðurömmunni og Júlía af því það er svo alþjóðlegt og rómantískt,“ segir Helga. Þættirnir eru á dagskrá á sunnudagskvöldum klukkan 20.20. Fjallað er um morð, bruna og bankarán sem aldrei hafa verið upplýst. Röðin telur sex þætti. Sá síðasti fer í loftið á milli jóla og nýárs.