Löskuð Fernanda enn í vari

Allt kapp er lagt á að afstýra umhverfisslysi við Reykjanesskaga þar sem varðsskipið Þór er nú með flutningaskipið Fernöndu í togi. Litlar líkur eru á að Fernanda sökkvi í sæ að mati Landhelgis-gæslunnar.

Varðskipið Þór hefur haft flutningaskipið Fernöndu í togi við Reykjanesskaga frá því að skipið var flutt alelda úr Hafnarfjarðarhöfn á föstudaginn. Slæmt veður hefur verið við Hafnir í dag en úr fjöruborðinu við Kirkjuvog blasir einkennileg sjón. Þór dregur þar Fernöndu fram og til baka.

Slökkviliðsmenn fóru um borð í skipið fyrr í dag og sáu þar að járn var sveigt og bogið, slíkur var hitinn í Fernöndu. Kvoðu var sprautað í vélarúm og neðri þilför skipsins til að tryggja að eldurinn væri sannarlega dauður.

Eins og sjá má er Fernanda verulega löskuð eftir brunann mikla. Slökkviliðsmenn hafa metið aðstæður um borð í Fernöndu í dag, þeim til aðstoðar voru tveir gúmmíbátar sem ferjuðu bæði menn og búnað milli varðskips og járnhrúgunnar sem eitt sinn var Fernanda.

Ólíklegt þykir að Fernanda verði flutt til Hafnar í dag enda eru óvissuþættirnir margir. Ákvörðun um framhaldið verður væntanlega tekin í kvöld eða á morgun. Ljóst er að það verður vandasamt verk að dæla þeim hundrað tonnum af olíu sem eru í tönkum Fernöndu.

„Ekki verður haldið áfram með Fernöndu í dag,“ segir Ásgrímur L. Ásgrímsson, framkvæmdastjóri aðgerða hjá Landhelgisgæslunni. „En við munum halda áfram að tryggja það að engin glóð leynist í skipinu.“

Sp. blm. Er engin hætta á að skipið beinlínis sökkvi við Reykjanesskaga?

„Skipherra og hans menn eru sannfærðir um að litlar líkur séu á því. Skipið flýtur vel og lætur vel í sjónum.

Það hvernig farið verður með olíuna um borð í Fernöndu er á forræði Umhverfisstofnunar og undirverktaka.

„Varðandi Wilson Muuga þá heppnaðist sú aðgerð mjög vel. Olíudreifing kom að því máli meðal annara og þeir eru manna fremstir hér á landi til að takast á við þetta verkefni sem er Fernanda,“ segir Ásgrímur.

Landhelgisgæslan tilkynnti síðdegis í dag að ákveðið hefði verið að draga Fernöndu inn fyrir Garðskaga og leiti vars í ríkjandi vindum. Staðan verður endurmetin í fyrramálið.