Innlent

Svikahrappar nýta sér neyð á leigumarkaði

Þórhildur Þorkelsdóttir skrifar
Svikahrappar misnota sér bága stöðu leigumarkaðarins hér á landi til að svíkja fé út úr fólki. Slík mál koma nánast daglega inn á borð til fjármunabrotadeildar lögreglunnar.

Nokkuð er um að óprúttnir aðilar auglýsi íbúðir til leigu á hinum ýmsu vefsíðum með það í huga að svíkja peninga út úr fólki. Þessir aðilar segjast yfirleitt vera búsettir erlendis og geti því ekki sýnt íbúðirnar, en lofa að lykillinn verði afhentur eftir greiðslu tryggingar.

Til eru dæmi um fólk sem hefur greitt þessum aðilum tryggingafé til þess að festa sér íbúð án þess að hafa skoðað hana. Þegar á reynir er íbúðin svo ekki í útleigu eða jafnvel ekki til. Ásta Hafberg situr í stjórn Samtaka leigjenda.  Hún segir fólk úti á leigumarkaðnum í mörgum tilfellum örvæntingarfullt. 

„Það hefur skapast bráðavandi í þjóðfélaginu í sambandi við leiguhúsnæði. Fólk er komið í mikla þörf fyrir húsnæði þegar það endar þarna. Fólk hoppar á auglýsingarnar og borgar tryggingafé án þess að vera komin með samning, lykil eða annað.“

Auglýsingar svikahrappanna eiga það sameiginlegt að þær eru í mörgum tilfellum undarlega fram settar og leigan er mjög hagstæð miðað við það sem gengur og gerist.

Margar slíkar auglýsingar eru bersýnilega skrifaðar með hjálp þýðingarvélarinnar Google translate, en Ásta segir það ekki alltaf vera raunina. Auglýsingar af þessu tagi eru oft mjög trúverðugar og í raun sé ekkert tilefni til að draga í efa að þær séu raunverulegar.

Hafliði Þórðarson, lögreglufulltrúi hjá fjármunabrotadeild, sagði í samtali við fréttastofu að slík mál komi inn á borð til lögreglu nánast daglega og að dæmi séu um að fólk hafi tapað töluverðum fjármunum. Hafliði segir vonlaust að hafa uppi á svikahröppunum eftir að þeir hafa fengið greitt og hvetur fólk til að greiða aldrei fram peninga áður en það er komið með lyklana í hendurnar.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.