Vill „parkera sjónvarpskonunni“ á sumrin og vera sirkuslistamaður

„Þetta getur í alvörunni gerst,“ segir sjónvarpskonan og sirkuslistamaðurinn Margrét Erla Maack, en hún er meðlimur Sirkuss Íslands sem hefur undanfarið safnað fyrir sirkustjaldi á vefsíðunni Karolina Fund.

Tjaldið sem sirkusinn hefur augastað á kostar rúmlega sex milljónir króna og stendur til að ferðast um landið á sumrin með sirkusinn, bæði til þess að halda sýningar og sirkusnámskeið fyrir börn og fullorðna. „Ég vil bara parkera sjónvarpskonunni á sumrin og vera sirkuslistamaður,“ segir Margrét.

Söfnunin stendur til miðnættis í kvöld og Margrét er vongóð um að markmiðið náist. „Það er búið að ganga rosa vel, sérstaklega um helgina er búið að gefa vel í. Við sjáum þetta á sjóndeildarhringnum. Við erum bara svo ógeðslega góður sirkus,“ segir Margrét og bætir því við að sirkusinn komi fólki alltaf á óvart. „Við höfum bæði heyrt það frá áhorfendum og atvinnusirkusfólki. Það eina sem vantar er tjaldið.“