Ómetanlegum hring stolið: „Eina sem ég erfði eftir mömmu“

„Hringurinn er það eina sem ég erfði eftir mömmu og er óbætanlegur. Öll fjölskyldan er í sjokki,“ segir Sigurlín Gústafsdóttir sem varð fyrir þeirri óskemmtilegu reynslu að brotist var inn til hennar, á meðan hún dvaldist í Barcelona, og ýmsum verðmætum stolið.

Meðal þess sem var stolið var fartölva, föt og skartgripir, þar á meðal hringurinn sem hún erfði eftir móður sína og kross sem hún erfði eftir ömmu sína.

Sigurlín, sem er þrítug, missti móður sína þegar hún var aðeins fimm ára og er missirinn því mikill eins og gefur að skilja. „Amma gekk mér því í móðurstað en hringurinn er það eina sem ég erfði eftir mömmu,“ segir Sigurlín. „Pabbi lét sérsmíða hringinn árið 1979 en það því miður er ekki til nein mynd af honum.“

Hringurinn sem um ræðir er 18 til 24 karata gullhringur með stórum rauðum rúbin. Sigurlín hefur biðlað til vina sinna á Facebook um að auglýsa eftir hringnum. Viðbrögðin hafa ekki látið á sér standa og í morgun voru þegar um 500 manns búnir að deila statusnum hennar.

„Ég varð klökk þegar ég sá viðbrögðin. Ég er ótrúlega þakklát öllu þessu fólki,“ segir Sigurlín.

Þjófarnir komumst inn um glugga á heimli Sigurlínar sem býr í Skógargerði. Útidyrahurðin á heimili hennar er þannig úr garði gerð að ekki er hægt að opna hana innan frá nema með lykli. Þjófarnir komust því ekki burt með stærri hluti.

„Sjónvarpið lá í sófanum. Þeir hafa reynt koma því út um gluggann en ekki tekist,“ segir Sigurlín sem var að vonum brugðið þegar hún kom heim frá Barcelona.

„Ég hef sofið voðalega lítið frá því ég kom heim og hrekk stundum upp á næturnar. Ég hefði ekki trúað því hvað er mikið sjokk að lenda í svona og ég skil ekki að fólk geti farið inn og rænt aðra.“

Post by Silla Gústafsdóttir.