Forsætisráðherra vill aðkomu SÞ vegna Sýrlands

Barack Obama Bandaríkjaforseti er spenntur fyrir því að koma í opinbera heimsókn til Íslands og sýndi málefnum norðurslóða mikinn áhuga á fundi sínum með leiðtogum Norðurlandanna í Stokkhólmi í gær. Forsætisráðherra segir íslensk stjórnvöld leggja áherslu á aðkomu Sameinuðu þjóðanna í málefnum Sýrlands.

Bandaríkjaforseti átti þriggja stunda kvöldverðarfund með leiðtogum Norðurlanda í boði Fredriks Reinfeldts forsætisráðherra Svíþjóðar í gærkvöldi. Á fundinum reifuðu leiðtogar Norðurlandanna nokkur mál fyrir Obama og þeirra á meðal Sigmundur Davíð Gunnlaugsson forsætisráðherra sem fór yfir málefni norðurslóða.

„Það sem mér finnst standa upp úr er mikilvægi þess að Norðurlöndin vinni saman í samskiptum við aðrar þjóðir, ekki hvað síst Bandaríkin. Bandaríkjaforseti er mjög hrifinn af mörgu því sem Norðurlöndin gera. En sérstaklega barst í tal hversu mikilvægt það væri að þessi lönd sem eru meðlimir að ólíkum bandalögum eða samtökum og eiga á vissan hátt ólíka hagsmuni, eru þó með þetta sterka samband sem skapar möguleika á tengingar í allar áttir,“ segir forsætisráðherra.

Sigmundur Davíð segir að rætt hafi verið um málefni Sýrlands, öryggismál, meðal annars netöryggismál, töluvert um umhverfis- og orkumál og norðurslóðamál.

„Sem mér þótti skemmtilegast því ég hafði tekið að mér að undirbúa kynningu á stöðu mála þar og Bandaríkjaforseti er greinilega mun áhugasamari um þau mál en Bandaríkjamenn hafa kannski verið um nokkur skeið , og utanríkisráðherra Bandaríkjanna reyndar líka,“ segir Sigmundur Davíð.

Hann telji því að meiri áhersla verði lögð á norðurslóðir en verið hafi hingað til. Bandaríkjaforseti virðist hafa einlægan áhuga á umhverfismálum og þeirri þekkingu sem Íslendingar hefðu á sviði orkumála. En málefni Sýrlands voru líka fyrirferðarmikil og Sigmundur Davíð segir Obama hafa fært fram rök fyrir aðgerðum þar.

„Án þess að ég fari nákvæmlega að útlista hvað hann sagði á þessum fundi , þá hefur hann auðvitað lýst því yfir að hann vilji gjarnan fá stuðning sem flestra við þær aðgerðir sem hann telur nauðsynlegar í Sýrlandi. Og það hefur líka komið fram opinberlega að Norðurlöndin, að minnsta kosti flest, leggja áfram mikla áherslu á aðkomu Sameinuðu þjóðanna,“ segir forsætisráðherra.

Og það væri afstaða íslenskra stjórnvalda þótt öryggisráðið hefði hingað til ekki staðið sig sem skyldi. En forsætisráðherra bauð Obama í opinbera heimsókn til Íslands. Ef Obama þekkist boðið væri það í fyrsta skipti sem forseti Bandaríkjanna kæmi hingað í opinbera heimsókn, þótt Nixon og Reagan hafi komið hingað í þeim erindum að hitta aðra erlenda leiðtoga.

Hvernig tók hann í það?

„Hann tók nú skemmtilega vel í það, ekki það að slíku er nú oft vel tekið. En það vildi svo vel til að upplýsingafulltrúi hans er nýbúinn að vera á Íslandi og Bandaríkjaforseti var nýbúinn að sitja með honum og  ræða um Ísland.  Upplýsingafulltrúinn var mjög áhugasamur um landið eftir heimsóknina  og það hafði smitast yfir í forsetann sem var held ég bara býsna spenntur fyrir því að heimsækja Íslendinga,“ segir Sigmundur Davíð Gunnlaugsson.