Innlent

Segir myndböndin sýna „slæmt“ ofbeldi

Haraldur Guðmundsson skrifar
Leikskólinn 101 stendur á horni Bræðraborgarstígs og Vesturgötu.
Leikskólinn 101 stendur á horni Bræðraborgarstígs og Vesturgötu. Mynd/GVA
Fyrrverandi sumarstarfsmaður á leikskólanum 101 á Vesturgötu í Reykjavík segist eiga þrjú til fjögur myndbönd sem sýni „slæmt“ ofbeldi gegn börnum. Þar á meðal sé upptaka af starfsmanni leikskólans að rassskella barn. Hún segir sig og annan fyrrverandi sumarstarfsmann hafa ákveðið að taka upp umrædd myndbönd svo þeim yrði trúað.

Ríkisútvarpið greindi frá málinu í gærkvöldi og sagði starfsmennina fyrrverandi hafa farið með málið inn á borð Barnaverndar Reykjavíkur sem síðan ákvað að taka það til rannsóknar.

Eins og sagði í frétt á Vísi fyrr í dag þá hafna stjórnendur leikskólans alfarið ásökunum um að hafa beitt börn sem þar dvöldu margvíslegu harðræði í yfirlýsingu sem þeir sendu frá sér. Þar segjast þeir fagna því að málið sé nú í rannsókn og að rannsóknin muni leið hið sanna í ljós. 

Fréttastofa óskaði eftir viðbrögðum starfsmanna skóla- og frístundasviðs Reykjavíkurborgar nú fyrir hádegi en án árangurs.

Uppfært kl. 13.00:

Samkvæmt heimasíðu RÚV hafa tveir starfsmenn leikskólans verið sendir í leyfi á meðan rannsóknin stendur yfir.

Uppfært kl 14:20

Hulda Linda Stefánsdóttir, leikskólastjóri, staðfesti í samtali við Vísi að tveir starfsmenn hefðu verið sendir í leyfi. Hún sagðist hafa hringt persónulega í foreldra leikskólabarnanna þegar málið kom upp og að nokkur þeirra hefðu heimsótt hana í dag.

„En það er ekkert nýtt að frétta frá því ég gaf yfirlýsingu mína. Málið er einfaldlega í rannsókn,“ sagði hún.




Fleiri fréttir

Sjá meira


×