Almannavarnanefndir í viðbragðsstöðu

Almannavarnanefndir frá Blönduósi austur á Seyðisfjörð eru í viðbrögðsstöðu vegna óveðursins sem ganga á yfir norðanvert landið á föstudag og laugardag. Gert er ráð fyrir illviðri - að mörgu leyti líku því sem gekk yfir landið í byrjun september í fyrra og hafði í för með sér mikinn fjárskaða á Norðurlandi.

Almannavarnardeild ríkislögreglustjóra hafði í gær samband við lögregluembætti á Norður- og Austurlandi og í framhaldi voru haldnir samráðs- og upplýsingafundir með almannavarnarnefndum, sveitastjórum, bændum og fleirum.

Samkvæmt veðurspá sem gerð var í morgun fyrir föstudag, gengur í norðvestan 18-23 m/s NV-til á landinu með mikilli rigningu, en snjókoma ofan 200-300 metra yfir sjávarmáli. Norðvestan og vestan 15-23 á SV- og S-landi og rigning. Mun hægari vindur á A-verðu landinu og úrkomulítið. Hiti frá 1 stigi síðdegis NV-til, upp í 12 stig austast.

Á laugardaginn er spáð norðan og norðvestan 15-23 m/s fyrir hádegi, en hægari vindur NA-til. Talsverð eða mikil rigning N-til á landinu, en snjókoma í meira en 200-300 metra hæð yfir sjó. Úrkomulítið S-lands. Norðvestan 13-18 NA-til síðdegis með rigningu á láglendi, annars slyddu eða snjókomu, en dregur úr vindi og úrkomu V-til. Hiti 1 til 9 stig, kaldast í innsveitun N-til og frystir þar um nóttina.

Í tilkynningu frá almannavarnadeild ríkislögreglustjóra er því sérstaklega beint til ferðaþjónustuaðila að þeir upplýsi viðskipavini sína um veðurspár og ráðleggi þeim frá ferðalögum á norðanvert hálendið um helgina.

Miðað við veðurspár er líklegt að það snjói víða á fjallvegi og því sérstaklega mikilvægt að upplýsingar berist til ferðamanna sem eingöngu eru búnir bifreiðum til sumaraksturs. Þeir sem hyggja á ferðalög eru hvattir til að fylgjast vel með veðurútliti á heimasíðu Veðurstofunnar og færð á vegum á heimasíðu Vegagerðarinnar áður en haldið er af stað.

Almannavarnadeild ríkislögreglustjóra fylgist náið með framvindunni í samvinnu við Veðurstofuna og miðlar upplýsingum á heimasíðu Almannavarna og á Facebooksíðu deildarinnar.