Norska konan náðuð í Dúbaí

Hin norska Marte Deborah Dalelv segist hafa verið náðuð í Dúbaí. Hún hlaut 16 mánaða fangelsisdóm eftir að hafa kært nauðgun.

Hún átti fund með saksóknara í morgun ásamt lögfræðingi sínum, Mahmúd Azab Abú Gareda. Hún fékk vegabréf sitt afhent í gær og henni er nú frjálst að fara ferða sinna.

Dalevl, sem er 24 ára gömul, leitaði til lögreglu í Dúbaí í mars og kærði samstarfsmann sinn fyrir að hafa nauðgað sér. Niðurstaða dómstóla í Dúbaí var sú að hún hlaut 16 mánaða dóm fyrir að hafa stundað kynlíf utan hjónbands og drukkið áfengi.

Dómurinn vakti hörð viðbrögð á Vesturlöndum og eftir mikinn þrýsting ákvað saksóknirinn í Dúbaí að taka málið til endurskoðunar.