Sálarmorð og eineltisviðbjóður vinstri haturshjarðarinnar

„Hvílíkur álitsgjafi, Þorbjörn Broddason, sem sér allt með rauðum gleraugum. Morgunblaðið er mun vandaðri fjölmiðill en aftökupallurinn rúv er fyrir dómstól götunnar og vinstri haturshjörðina, sem einangrar alla umræðu á þessari síðu eins og á rúv,“ skrifar Ólafur F. Magnússon, fyrrverandi borgarstjóri. Hann stingur óvænt niður penna í athugsemdakerfi Eyjunnar sem hefur gert sér nokkurn mat úr grein sem Hallur Hallsson skrifaði um fréttastofu RÚV, sem Hallur vill meina að sé áróðursmiðill vinstri aflanna. Eyjan greinir frá því að Þorbjörn Broddason rísi upp til varnar Ríkisútvarpinu, sem telur Morgunblaðið jaðarfyrirbæri eftir að það komst í eigu útvegsmanna og réði Davíð Oddsson sem ritstjóra. Þetta virðist hafa kveikt í Ólafi sem dregur hvergi af sér:

„Sori og persónuníð er sérgrein ykkar vinstri manna en ekki Morgunblaðsins. Og þið ýmist hirðið ekki um rök eða lesið ekki Morgunblaðið! Sem þið líkið við sovéska glæpamiðla! Um eineltisviðbjóðinn gegn mér á sínum tíma vitnar allt sem sagt var um persónu mína og beindist gegn mér og ástvinum mínum á rúv og á ykkar ágætu vinstri smugum og eyjum, sem minna mig fremur á trúarhóp en málefnalega umræðu.“

Kastljósmenn fá það óþvegið

Og borgarstjórinn fyrrverandi heldur áfram, og virðist eiga óuppgerðar sakir við Kastljósmenn: „Ég hef t.d. skoðað Kastljóssþætti úr borgarstjóratíð minni og blöskrar hve ómálefnalegir þeir félagar Helgi Seljan og Sigmar Guðmundsson voru og kölluðu þeir m.a. álitsgjafa um líferni mitt og einkalíf í þátt til sín til að ata mig sora með skipulegum hætti. Það er gróft brot á öllu sem getur varðað leikreglur ríkisfjölmiðils.“

Ofbeldi og sálarmorð

Og Ólafur lýkur pistli sínum til varnar Davíð Oddssyni, þá á almennum nótum um óþverraskap vinstri manna: „Það er gott að þjappa sér saman í sælu sjálfsblekkingarinnar, eins og hatursáróður ykkar gegn Morgunblaðinu og Davíð Oddssyni vitnar um. Verkin tala og þau afhjúpa þá staðreynd að það eru fyrst og fremst vinstri menn utan sem innan rúv, sem stunda skipuleg sálarmorð á þeim borgaralegu einstaklingum sem vilja ekki samsama sér með soranum. Eða láta undan ofbeldi ykkar vinstri manna.“