Stúdentar funda með ráðherra í fyrsta skiptið í dag

Formenn stúdentafélaganna munu funda með menntamálaráðherra í dag. Hún segir breytingarnar einnig bitna á öryrkjum.

Formenn Stúdentaráða landsins munu funda með Illuga Gunnarssyni menntamálaráðherra síðdegis í dag en það verður fyrsti formlegur fundurinn á milli þessara aðila. Umræðuefnið er breytingar á fyrirkomulagi Lánasjóðs námsmanna, LÍN, og mikið ber í milli samkvæmt Maríu Rut Kristinsdóttur formanns Stúdentaráðs sem rætt var við í Íslandi í bítið í morgun.

„Það eru allir sammála um að það er illa að þessu staðið,“ sagði María Rut í morgun en hún segir stúdenta helst óásátta við samráðsleysi og stuttan fyrirvara, en til stendur að breytingarnar, sem munu hafa veruleg áhrif á líf stúdenta, muni taka giildi næsta haust.

María Rut segir breytingarnar einnig eiga eftir að hafa alvarleg áhrif á öryrkja í námi. Nú þurfa þeir að klára ellefu einingar í stað níu. Þetta er þó vandkvæðum bundið.

María Rut bendir á að námið bjóði langoftast upp á tíu eininga áfanga, og svo sex einingar, það sé því tæknilega flókið að ætla að skila ellefu einingum.

María Rut segir skilningsleysi á raunaðstæðum í skólanum, „okkur finnst þetta bera keim af töluleikjum ráðamanna,“ Segir formaður stúdentaráðs að lokum. Hægt er að hlusta á viðtalið við hana hér fyrir ofan.