Hestarnir fældust ekki við bílflautið

Ökumaður, sem var sagður hafa flautað á hóp barna sem voru í reiðtúr á Kjóavöllum í Garðabæ um miðjan síðasta mánuð með þeim afleiðingum að hestarnir fældust og fimm ára piltur hlaut innvortis blæðingar, verður ekki kærður fyrir atvikið.

Lögreglan í Hafnarfirði segir að flautið hafi komið töluvert seinna, eftir að hestarnir höfðu fælst.

Í fyrstu var sagt frá því að ökumaðurinn hafi flautað á krakkana sem voru á ferð yfir götu. Það segir lögreglan ekki vera rétt. „Það virðist eitthvað hafa skolast til þarna í upphafi, en þetta var ekki svona. Það er í rauninni ómögulegt að segja hvað það var sem orsakaði það að hestarnir fældust. Það var að minnsta kosti ekki við þetta flaut - það kom töluvert síðar,“ segir lögreglumaður, sem stýrði rannsóknni, í samtali við fréttastofu.

Lögreglan náði tali af ökumanni sem átti leið um Kjóavellina á þessum tíma, þennan umrædda dag. Eftir að hafa rætt við hann og fleiri sem voru á vettvangi er niðurstaðan sú að flautið hafi ekki orsakað það að hestarnir fældust. Rannsókninni er lokið, og telst málið upplýst. Enginn verður kærður í málinu, að sögn lögreglu.