Snowden ætlar að berjast gegn framsali

Uppljóstrarinn Edward Snowden sem lak því til fjölmiðla að bandarískar leyniþjónustur standi í stórfelldum persónunjósnum um allan heim segist ætla að berjast kröftuglega gegn því að hann verði framseldur til Bandaríkjanna. Snowden var verktaki fyrir CIA leyniþjónustuna og flúði hann til Hong Kong þegar greint var frá lekanum í Guardian.

Hann fer nú huldu höfði en vefsíðan South China Morning Post hefur birt við hann viðtal þar sem hann segist hvorki vera föðurlandssvikari né hetja. Hann segist ekki hafa flúið til þess að forðast réttvísina heldur til að afhjúpa glæp.

Snowden, sem hafði áður lýst yfir vilja til að sækja um hæli á Íslandi segist treysta dómstólum í Hong Kong til þess að ákveða örlög sín.