Engin endurnýjun hefur átt sér stað

"Siggi (Sigurður Ragnar Eyjólfsson) er náttúrulega búinn að ná frábærum árangri með þetta lið og lyfta því upp. Það er allt annað í dag og í allt öðru umhverfi," segir Hlynur Svan Eiriksson þjálfari kvennaliðs Breiðabliks.

Íslenska kvennalandsliðið tapaði 3-2 gegn Skotum í æfingaleik á laugardaginn. Úrslitin skipta í sjálfu sér engu máli en velta má stöðu landsliðsins fyrir sér. Það hefur tapað fimm af síðustu sex leikjum sínum en rétt rúmur mánuður er þar til flautað verður til leiks á Evrópumótinu í Svíþjóð.

„Bestu leikmennirnir í landsliðinu, uppistaðan í því, eru hvattir til þess að fara út að spila," segir Hlynur Svan þegar hann var beðinn um að velta fyrir sér stöðu mála hjá landsliðinu. Hann segist spyrja sig að því í hvaða umhverfi stelpurnar fari og hversu stór fótboltinn sé þar.

„Það er klárt mál að ákveðin lið, t.d. Malmö, eru virkilega sterk. Ég set spurningamerki við norsku deildina. Hversu sterk er hún?" segir Hlynur Svan og segir hið sama gilda um efstu deild á Englandi. Honum finnst leikmenn leggja of mikla áherslu á að komast út að spila en grasið sé ekki endilega alltaf grænna erlendis.

„Rakel Logadóttir fór út til liðs í Noregi en kom heim og sagðist ekki hafa neinn áhuga á að staldra þar við. Liðið hefði verið lélegra en Valsliðið og öll aðstaða miklu lélegri," segir Hlynur.

Hann bendir á að í þolprófi sem íslensku landsliðsstelpurnar voru látnar gangast undir á Algarve-mótinu í mars hafi stelpurnar sem spili sem atvinnumenn erlendis heilt yfir ekki komið betur út en þær sem spili hér á landi.

Hlynur Svan hefur einnig áhyggjur af því hve endurnýjun sé skammt á veg komin hjá liðinu.

„Lítil endurnýjun hefur orðið á undanförnum árum ef innkoma Glódísar er frátalin. Það er eins og leikmenn eigi sitt fasta sæti," segir Hlynur. Hann telur of skamman tíma til að gera alvarlegar breytingar á liðinu núna. Hefði hann getað valið lið myndi hann leggja áherslu á að velja leikmenn sem gætu hlaupið á fullu í 90 mínútur og litið að einhverju leyti fram hjá knattspyrnulegri getu.

Hlynur segir að mikill munur hafi verið á frammistöðu íslensku stelpnanna í fyrri hálfleiknum og þeim síðari gegn Skotum á laugardaginn. Munurinn hafi fyrst og fremst verið í hlaupagetu leikmanna.

„Ef það hefði verið kílómetramælir á leikmönnum þá hefði komið í ljós að stelpurnar hlupu miklu meira í seinni hálfleiknum," segir Hlynur.

Hann minnir á að mikill uppgangur sé í kvennaknattspyrnu um alla Evrópu.

„Liðin eru að verða sterkari og sterkari. Það verður erfiðara og erfiðara fyrir Ísland að halda sér svo ofarlega á heimslistanum," segir Hlynur.

Þjálfari Blikanna hefur miklar áhyggjur af formleysi og meiðslum leikmanna.

„Mesta áhyggjuefnið er að það eru alltof margir leikmenn sem eiga langt í land, hvort sem það er formleysi eða tengist meiðslum. Það eru of margir leikmenn sem eiga alltof mikið inni og ættu að geta meira."

Hlynur segir það jákvæða í stöðunni vera þá staðreynd að liðið geti aðeins bætt sig.

„Við eigum að geta unnið bæði Noreg og Holland og komist áfram úr riðlinum," segir Hlynur.

Íslenska kvennalandsliðið mætir Dönum í æfingaleik í Viborg þann 20. júní. Fyrsti leikur liðsins á EM er gegn Noregi 11. júlí í Kalmar.