Krónan framtíðargjaldmiðill Íslendinga

„Krónan verður gjaldmiðill Íslendinga um fyrirsjáanlega framtíð," segir í stjórnarsáttmála Framsóknarflokksins og Sjálfstæðisflokksins sem Sigmundur Davíð Gunnlaugsson og Bjarni Benediktsson, formenn flokkanna, eru að kynna að Laugarvatni. Þar segir jafnframt að renna þurfi styrkari stoðum undir peningastefnuna með traustri hagstjórn sem taki mið af aðstæðum og hagsveiflum.

Þá segir að ábyrg efnahagsstjórn sé forsenda velferðar, öflugs heilbrigðis- og menntakerfis, löggæslu og annarrar grunnþjónustu. Agi og jafnvægi í ríkisfjármálum gegni lykilhlutverki við að tryggja stöðugleika, lægri vexti og litla verðbólgu.   

Ætla að taka á skuldavanda þjóðarinnar

Í stjórnarsáttmálanum segir að ríkisstjórnin muni með markvissum aðgerðum taka á skuldavanda íslenskra heimila sem sé til kominn vegna hinnar ófyrirsjáanlegu höfuðstólshækkunar verðtryggðra lána sem leiddi af hruni fjármálakerfisins. „Grunnviðmiðið er að ná fram leiðréttingu vegna verðbólguskots áranna 2007-2010 en í því augnamiði má beita bæði beinni niðurfærslu höfuðstóls og skattalegum aðgerðum. Um verður að ræða almenna aðgerð óháð lántökutíma með áherslu á jafnræði. Beita má fjárhæðartakmörkum vegna hæstu lána og setja önnur skilyrði til að tryggja jafnræði í framkvæmd og skilvirkni úrræða," segir í stjórnarsáttmálanum.

Þá segir að rétt sé að nýta svigrúm, sem að öllum líkindum myndist samhliða uppgjöri þrotabúanna, til að koma til móts við lántakendur og þá sem lögðu sparnað í heimili sín, „rétt eins og neyðarlögin tryggðu að eignir þrotabúanna nýttust til að verja peningalegar eignir og endurreisa innlenda bankastarfsemi," segir í stjórnarsáttmálanum. Ríkisstjórnin heldur þeim möguleika opnum að stofna sérstakan leiðréttingarsjóð til að ná markmiðum sínum.

Dregið úr vægi verðtryggingarinnar

Þá segir að æskilegt sé að nýta það tækifæri sem gefst samhliða skuldaleiðréttingu til að breyta sem flestum verðtryggðum lánum í óverðtryggð. Lækkun höfuðstóls nýtist þá til að koma í veg fyrir að mánaðarleg greiðslubyrði aukist verulega, jafnvel þótt lán verði greidd hraðar niður. Sérfræðinefnd um afnám verðtryggingar af neytendalánum og endurskipulagningu húsnæðislánamarkaðarins verður skipuð á fyrstu dögum nýrrar ríkisstjórnar. Áætlað er að hún muni skila af sér fyrir næstu áramót.

Unnið að afnámi fjármagnshafta

Í stjórnarsáttmálanum segir að eitt mikilvægasta verkefni ríkisstjórnarinnar verði að vinna að afnámi fjármagnshafta en gjaldeyrishöftin bjagi eignaverð og dragi úr samkeppnishæfi þjóðarinnar. „Greina þarf efnahagsstöðu íslenska þjóðarbúsins og útfæra áætlun um afnám hafta með hliðsjón af mikilvægi gjaldeyrisjöfnuðar fyrir land og þjóð. Sérstaklega þarf að tryggja trausta umgjörð um gjaldeyrismarkaðinn til framtíðar og sjá til þess að skuldaskil fallinna fjármálafyrirtækja ógni ekki efnahagslegum stöðugleika," segir í stjórnarsáttmálanum.

Áfram byggt á aflamarkskerfinu

Í kafla um sjávarútvegsmál segir að byggt verði á aflamarkskerfi og lög um veiðigjald verði endurskoðuð. Almennt gjald skuli endurspegla afkomu útgerðarinnar í heild en sérstakt gjald taka sem mest mið af afkomu einstakra fyrirtækja.



Hér er hægt að lesa stefnuyfirlýsingu ríkisstjórnar Framsóknarflokksins og Sjálfstæðisflokksins í heild sinni.