Aukinn kraftur settur í eftirlit með gistiheimilum

Yfirvöld hyggjast setja aukinn kraft í eftirlit með gistiheimilum sem ekki hafa tilskilin leyfi fyrir þesskonar starfsemi. Ríkisskattstjóri fékk í vor heimild til að loka þeim gistiheimilum sem ekki standa í skilum við skattinn. Framkvæmdarstjóri Samtaka ferðaþjónustunnar segir að lítill árangur sjáist af vinnu yfirvalda og að ólöglegum gistiplássum fari fjölgandi.

Lengi hefur rætt um ólögleg gistirými í Reykjavík og hafa Samtök ferðaþjónustunnar verið dugleg að benda á vandamálið. Til að mynda með nákvæmri úttekt fyrir tveimur árum þar sem öll ólögleg gistipláss í Reykjavík voru kortlögð. Leyfunum fjölgaði töluvert í kjölfarið en í sumar stefnir í að ólögleg gistipláss verði fleiri nokkru sinni áður.

„Þetta er bara staðreynd, það eru mörghundruð leyfislausar íbúðir í miðbænum og sala á gistirýmum til ferðamanna er leyfisskyld og það ætti að loka rýmum umsvifalaust sem eru ekki með leyfi,“ segir Erna Hauksdóttir, framkvæmdastjóri Samtaka ferðaþjónustunnar.

Ekki er hægt að tala um neðanjarðarstarfsemi í þessum geira. Á vefsíðunni airbnb auglýsa um 800 manns, gistingu af ýmsum toga, allt frá einu herbergi upp í einbýlishús. Fréttastofa hafði samband við nokkra leigusala á þessari síðu og spurði þá hvert þeir hefðu tilskilin leyfi og hvort einhver hafi rukkað þá um slíkt.

Í ljós kom að enginn þeirra var með leyfi frá lögreglustjóranum á höfuðborgarsvæðinu né hafði athugasemd borist frá sama embætti sem hefur eftirlit með því að lögum og reglum sé fylgt. Sumir gefa allar tekjur upp til skatts, aðrir hluta eða alls ekkert. Leigusalarnir sem fréttastofa talaði við höfðu verið mislengi í þessum viðskiptum, allt frá sex mánuðum upp í fjögur ár. Allir höfðu sömu sögu að segja um bókanir, þær gengu vel og hjá sumum var nánast fullbókað út sumarið nú þegar.

Aðgerðahópur skipaður fulltrúum frá fjármálaráðuneytinu, ríkisskattsstjóra, lögreglustjóra og ferðaþjónustunni hefur undanfarna mánuði unnið að úrbótum í þessum málaflokki. Kynning á þeim verða á næstu dögum.

Stefán Eiríksson, lögreglustjóri á höfuðborgarsvæðinu sagði í samtali við fréttastofu í dag að eftirlit með ólöglegum gistirýmum sé ekki í forgangi hjá embættinu. Engu að síður væri öllum ábendingum fylgt eftir.

Ríkiskattstjóri fékk í vor heimild til að loka þeim gistiheimilum sem ekki standa í skilum við skattinn og sagði Skúli Eggert Þórðarson, ríkisskattstjóri við fréttastofu í dag að þær yrðu nýttar í sumar.