"Þó þetta líti eðlilega út þá er þetta heilmikið mál"

Það getur tekið allt upp undir ár fyrir konur sem kjósa að láta byggja upp ný brjóst eftir að hafa gengist undir brjóstnám í forvarnarskyni, segir lýtalæknir. Ferlið sé oft og tíðum langt og strangt og ýmislegt getur komið upp á. Frá 2007 hafa tvær til fimm konur á ári gengist undir slíkar aðgerðir.   

Ákvörðun Hollywood leikkonunnar Angelinu Jolie um að fjarlægja bæði brjóst sín í forvarnarskyni   hefur án efa vakið mikla eftirtekt og umræðu um allan heim. Það að hún skildi greina frá þessu opinberlega hefur haft mikil áhrif á konur víða sem ef til vill bera hið ættgenga brjóstakrabbameinsgen eins og Jolie. En það er ekki einfalt mál fyrir allar konur að láta fjarlægja brjóst sín hvort sem það er vegna veikinda eða í forvarnarskyni.  

„Í dag er konum ráðlagt að fara í brottnám ef þær greinast með brjóstakrabbameinsgenið sem dregur allverulega úr líkum á því að þær veikist. Eða þær geta verið í svokölluðu hááhættueftirliti sem felst í brjóstasegulómun árlega og ómskoðun. Og það er gert á sex mánaða tímabili," segir Þórdís Kjartansdóttir lýtalæknir. Mikið sé hægt að gera fyrir konur í dag sem gangast undir brjóstnám en það geti oft verið langt og strangt ferli.  

„Þetta er ekki eins og að fara í brjóstastækkun og ekki endilega einföld aðgerð en hún gengur yfirleitt vel. Þó þetta líti eðlilega út þá er þetta heilmikið mál, engin aðgerð er áhættulaus því það er hægt að fá blæðingu og sýkingu í hvað sem er og svo náttúrulega bætast allskonar fylgikvillar við þessa aðgerð."

Við brjóstnám er allur brjóstvefur fjarlægður og geirvartan líka, óski konan eftir því en húðin er skilin eftir.  Með henni er hægt að byggja upp nýtt brjóst og koma fyrir sílikon púða. En þá er eftir að byggja upp geirvörtu sem oft er gert með því að skera fleyg úr eyrnarsnepli og svo er vörtubaugurinn húðflúraður.   

Þórdís segir að allt ferlið geti tekið allt upp undir ár eða skemur og það velti oft á því hvort hægt sé að byggja upp brjóst í einni aðgerð.  

Allur kostnaður er greiddur af ríkinu en konur bera einnig einhvern kostnað með heimsóknum á læknastofur og göngudeildir. Frá 2007 hafa á bilinu 2-5 konur á ári gengist undir slíka aðgerð í forvarnarskyni.