Börnin alveg róleg

Betur fór en á horfðist þegar kviknaði í út frá þvottavéla á leikskólanum Árbæ við Fossveg 1 á Selfossi á ellefta tímanum í morgun. Fréttablað Suðurlands greindi fyrst miðla frá þessu.

Leikskólanum er skipt upp í þrjú hólf með eldvarnarhurðum. Reykurinn kom upp í miðrýminu og fór öryggiskerfið í gang. Símtal barst frá Öryggismiðstöðinni þar sem leikstkólastjórinn óskaði eftir aðstoð slökkviliðs.

Leikskólastjórinn Kristín Eiríksdóttir segir í samtali við Vísi allt hafa gengið samkvæmt áætlun. Rýmingaráætlun hafi verið fylgt eftir en þetta sé í fyrsta skipti sem komi til þess að nota hana. Hún hafi þó verið æfð áður og það hafi komið sér vel.

120 börn eru á leikskólanum. „Börnin voru alveg róleg en ég held að það hafi verið af því starfsfólkið var svo rólegt," segir Kristín. Farið var með börnin út og þau klædd í fötin þar. Sum þeirra hafi þegar verið úti við leik enda veður gott.

Litlu síðar var slökkviliðið mætt og sömuleiðis rafvirki sem starfar í næsta húsi. Slökkviliðið reykræsti húsið og að því loknu gátu börnin og starfsfólk snúið aftur á leikskólann.

Börnin snæddu hádegisverð þegar blaðamaður náði tali af Kristínu. Á boðstólnum var reyktur fiskur með rófum og tilheyrandi.