Halim Al gæti hugsanlega hjálpað

„Málið verður víst ekki tekið fyrir í dag. Þeir vita ekkert hvenær málið verður tekið fyrir. Það er búið að taka þá úr málinu. Þetta lítur verr út með hverjum deginum," segir Þóra Björg Birgisdóttir.

Eiginmaður Þóru, Davíð Örn Bjarnason, er í haldi í fangelsi í Tyrklandi líkt og fjallað hefur verið um á Vísi undanfarinn sólarhring. Parið var gripið með grjót í farangri sínum á leiðinni frá Tyrklandi en tollverðir telja að um fornmuni hafi verið að ræða.

Þóra Björg var nýbúin að ræða við Jóhann Jóhannsson, sérfræðing í borgaraþjónustu utanríkisráðuneytisins þegar blaðamaður heyrði í henni hljóðið eftir hádegi.

„Hann sagði mér að dómarinn hefði úthlutað honum tyrkneskum lögfræðingi. Þeir sem utanríkisráðuneytið skaffaði fá ekki lengur að verja hann," segir Þóra Björg greinilega áhyggjufull.

Ræðismaður Íslands í Tyrklandi, Selim Sariibrahimoglu, vinnur að málinu fyrir hönd utanríkisþjónustu Íslands. Honum hefur þó ekki enn tekist að hafa upp á nýjum lögfræðingi Davíðs.

„Það veit enginn hvar lögfræðingurinn er. Það á að reyna að finna hann og hitta hann," segir Þóra Björg.

„Utanríkisráðuneytið veit ekki neitt. Hann sagði að þetta væri alltof loðið. Það væri alltof mikil móða yfir þessu. Það er búið að setja alla út í kuldann og við fáum ekkert að vita," segir Þóra Björg.

Fram hefur komið að Halim Al gæti mögulega aðstoðað fjölskylduna í málinu en enn hefur ekki náðst samband við hann.

„Halim Al er sameiginlegur fjölskylduvinur. Það er búið að reyna að ná sambandi við hann en ekki náðst samtal við hann. Það er búið að reyna að koma honum í þetta. Hann hefur verið að hjálpa Íslendingum þarna úti. Ég var buínn að senda allar upplýsingar á fjölskylduvininn en hann veit ekki hvernig á að ná í hann því við vitum ekkert."