Ríkisstjórnin setti Íslandsmet

Vantrauststillaga Þórs Saari á hendur ríkisstjórnarinnar var felld í dag með 32 atkvæðum gegn 29. Er það í annað sinn á kjörtímabilinu sem ríkisstjórnin stendur af sér vantrauststillögu, og er það í fyrsta skipti frá lýðveldisstofnun sem það gerist.

„Ég hafði búist við því að fleiri stjórnarliðar myndu fylgja sannfæringu sinni og treysta því að þjóðarvilji væri réttur og fengi að ráða för og að Alþingi bæri að fara að þjóðarvilja. En það var greinilegt að það var ekki niðurstaðan í dag og það veldur mér vonbrigðum," segir Þór Saari í samtali við fréttastofu Stöðvar 2, en hann ætlar ekki að styðja frumvarp formanna stjórnarflokkanna og Bjartrar framtíðar um breytingar á stjórnarskránni. Hann segir málið endanlega dautt.

„Ég held að þetta þing sem nú situr og meirihlutinn hér hann hafi slátrað því endanlega á miðvikudag í síðustu viku og gerði svo endanlega út af við það í dag. Því miður þá verður að finna hér einhverjar aðrar aðferðir við það að breyta stjórnarskránni ef að það verður einhvern tímann gert."

„Þetta var mjög ánægjuleg niðurstaða sem við fengum núna. Þetta gat alveg farið á báða vegu en ég bjóst frekar við því að við myndum standa þetta af okkur eins og við höfum gert áður," sagði Jóhanna Sigurðardóttir forsætisráðherra.

„Það er mjög dýrmætt fyrir okkur í stjórnarflokkunum að fá þessa traustsyfirlýsingu sem að þarna kom þannig að það er ótvírætt að ríkisstjórnarflokkarnir hafa hér meirihluta og ég vona að minnihlutinn í þinginu virði það."

En hversu tæpt stóð ríkisstjórnin á tímabili?

„Ég held ekki að hún hafi staðið tæpt, með 32 atkvæði og 29 sem vildu fella hana. Ég er bara mjög ánægð með þessa niðurstöðu og fagna henni."