Skúli Magnússon: Dómarar þurfa að standa í lappirnar gagnvart ákæruvaldinu

„Það er verið að fjalla um málið eins og köttur sem fer í kringum heitan graut, því spurningin er hvort dómarar geti staðið í lappirnar gagnvart rannsakanda opinbers máls," sagði Skúli Magnússon héraðsdómari á hádegisfundi Lögmannafélags Íslands þar sem rætt var sérstaklega um ógnir sem steðjuðu að trúnaðarsambandi lögmanna og skjólstæðinga þeirra.

Og það er ekki að ósekju að lögmenn séu hugsi vegna þessa en nokkur dómsmál á undanförnum árum hafa gengið nokkuð alvarlega inn á trúnað lögmanna og skjólstæðinga þeirra að mati Lögmannafélagsins.

Reimar Pétursson hæstaréttarlögmaður hélt framsögu ræðu um málið á hádegisfundi Lögmannafélagsins sem var haldinn á Grand Hóteli. Þar tiltók hann fjögur dæmi sem hann taldi sýna fram á að sótt væri harkalega að trúnaði lögmanna og skjólstæðinga.

Nýjasta málið eru orðaskipti á Alþingi þar sem Bjarni Benediktsson spurði Ögmund Jónasson innanríkisráðherra um hleranir á samtölum lögmanna og skjólstæðinga þeirra. Þá var lögmanni gert skylt að afhenda upplýsingar um skjólstæðinga sína og þá sem höfðu haft samband við hann vegna PIP brjóstapúðamálsins svokallaða á síðasta ári.

Fleiri dæmi voru nefnd, meðal annars víðtækar leitarheimildir á lögmannsstofunni Logos árið 2009.

Á fundinum var enginn fulltrúi hins opinbera sem hélt ræðu um málið. Skúli var gestur og tók til máls sem slíkur. Hann benti meðal annars á að það væru hugsanlega ekki alltaf reynslumestu dómararnir í héraðsdómum landsins sem tækju afstöðu til beiðna ákæruvaldsins. „Það væri ágætt að fá fleiri lögmenn í héraðsdóm eins og það þarf fleiri lögmenn í Hæstarétt," sagði Skúli og tók þá að hluta undir innlegg Jóns Steinars Gunnlaugssonar, fyrrverandi hæstaréttardómara, sem sagði vanta lögfræðinga með reynslu af lögmannsstörfum í Hæstarétt Íslands.

Síðar kom í ljós að á fundinum var fulltrúi ríkissaksóknara. Það var Daði Kristjánsson sem ávarpaði fundin stuttlega og sagði embættið tilbúið að vinna með Lögmannafélaginu að úrbótum vegna þessara álitamála. Meðal þess sem Reimar lagði til var að ríkissaksóknari ásamt dómstólaráði og Lögmannafélagi Íslands fyndu leið til þess að koma á sannfærandi eftirliti með eyðingu hlerunargagna á milli lögmanns og skjólstæðings. Eins lagði hann til að fulltrúi Lögmannafélags Íslands væri viðstaddur ef aftur kæmi til slíkra aðstæðna að húsleit yrði framkvæmd á lögmannsstofu.