EM 2020 fer fram í þrettán borgum

Evrópska knattspyrnusambandið gaf það út í dag að EM 2020 muni fara fram í þrettán borgum víðsvegar í Evrópu en ekki einu eða tveimur löndum eins og hingað til. Framkvæmdastjórn UEFA tók þessa ákvörðun á fundi sínum en Michael Platini, forseti UEFA, hafði áður rætt þessa hugmynd á opinberum vettvangi. Platini kallar þessa keppni "EURO for Europe" eða Evrópumót fyrir Evrópu.

UEFA mun velja þessar þrettán borgir í september 2014 en meðal skilyrða hjá hverri fyrir sig er að stuðningsmenn þeirra liða sem spila þurfi ekki að umgangast hverja aðra á viðkomandi flugvelli. Leikvellir fyrir undanúrslit og úrslitaleik þurfa að taka 70 þúsund áhorfendur, leikvellir í átta liða úrslitum þurfa að taka 60 þúsund áhorfendur en 50 þúsund manna vellir nægja fyrir leiki í sextán liða úrslitum og í riðlakeppni.

UEFA mun setja saman þrettán pakka fyrir viðkomandi borgir, tólf þeirra munu innihalda þrjá leiki í riðlakeppni og einn leik í 16 eða 8 liða úrslitum en sá síðasti mun innihalda undanúrslitaleiki og úrslitaleik sem fara fram á sama velli. Borgirnar þrettán verða að koma frá þrettán löndum.

Næsta Evrópumót fer fram í Frakklandi árið 2016 en það verður jafnframt fyrsta Evrópukeppnin með 24 þáttökuliðum því aðeins sextán þjóðir voru með á EM 2012 í Póllandi og Úkraínu.