Hart barist á Gamla Gauknum

Rithöfundarnir Þórarinn Eldjárn, Sigurbjörg Þrastardóttir, Madeline Miller og Mazen Maarouf etja kappi í framsögu á skemmtistaðnum Gamla Gauknum á sunnudag. Þetta er í annað sinn sem keppnin fer fram hér á landi.



„Þetta verður algjört dúndur,“ segir Halldór Halldórsson, betur þekktur undir nafninu Dóri DNA, en hann mun dæma í keppninni ásamt rithöfundinum Sigurjóni Birgi Sigurðssyni, öðru nafni Sjón, og leikkonunni Ólafíu Hrönn Jónsdóttur. „Ég er klárlega Randy Jackson ef það á að líkja þessu við Idol,“ segir Halldór um dómarastöðuna.



Keppnin kallast Literary Death Match og er alþjóðleg lestrarröð sem á rætur að rekja til Bandaríkjanna og er hugmyndin að brjóta upp hefðbundið upplestrarform og gera það skemmtilegt. „Það er gaman að upphefja bókmenntaformið, þrýsta þessu niður á lægra plan, þetta þarf ekki alltaf að vera svona formlegt. Það er alltaf gaman að gera eitthvað nýtt og sniðugt,“ bætir Halldór við.



Dómararnir velja tvo lesara sem komast áfram í lokaumferðina. Sigurvegarar hvorrar

umferðar reyna hvor annan í leikjum sem hafa óljósa bókmenntalega skírskotun. Sigurvegarinn fer heim með LDM-krúnuna, en ríkjandi meistari er Kári Túliníus.

Húsið verður opnað kl. 19.30 og kostar litlar 1.000 krónur inn.