Flúrarar flykkjast til Íslands

„Þeir voru kannski dálítið tregir fyrst, að fá húðflúrsstefnu inn í Súlnasalinn á Hótel Sögu. Þeir héldu að við myndum jafnvel skilja salinn eftir sem rjúkandi rúst. En þetta gekk og eftir á sögðust þeir sjaldan hafa átt samskipti við jafn kurteist og snyrtilegt fólk,“ segir Fjölnir Geir Bragason, betur þekktur sem Fjölnir tattú, um ráðstefnuna Icelandic Tattoo Expo sem haldin verður hér á landi um helgina.

Fjölnir er andlit ráðstefnunnar, sem haldin er í annað sinn, og hefst í dag klukkan þrjú. Um fimmtíu húðflúrarar verða við störf á hátíðinni í ár.

„Við erum að fá rjómann af húðflúrlistamönnum hingað til landsins. Um þrjátíu og fimm þeirra eru erlendir,“ segir hann og bætir við:

„Þetta gekk vonum framar í fyrra. Það mætti fjöldi fólks og við vorum sveittir á skallanum að flúra liðið. Ég heyri svo oft að fólk vilji fá sér flúr, en viti ekki hvað það vill fá sér. Fyrir það fólk er þessi hátíð tilvalin. Þarna verður um flestar stefnur húðflúrlistanna að velja, þannig að ég hvet fólk til að mæta snemma og kynna sér stefnur og skóla í húðflúri.“

Hátíðin er hugarfóstur Svans og Sessu sem reka húðflúrstofuna Tattoo og Skart.

„Það verður þétt dagskrá á hátíðinni, tónlistaratriði, tattúkeppni og þar fram eftir götunum. Þetta verður hin besta skemmtun og ég hvet sem flesta til að láta sjá sig, hvort sem þeir vilja láta flúra sig eða eru bara forvitnir,“ segir Fjölnir að lokum.

Post by Lífið á Visir.is.