Hófu rannsókn á máli meints Hagaskólaníðings eftir sýningu þáttar

Lögreglan á höfuðborgarsvæðinu hefur nú til rannsóknar kynferðisbrot barnaníðings sem grunaður er um að hafa sett sig í samband við ungar stúlkur í Hagaskóla. Rannsókn hófst í kjölfar sjónvarpsþáttar um barnaníð. Málið hefur vakið óhug meðal foreldra í Hagaskóla.

Eins og við greindum frá í fréttum okkar í gær virðist umfjöllun liðinna vikna og aukin vitundarvakning í samfélaginu um kynferðisbrot gegn börnum engin áhrif hafa á barnaníðinga. Hneigðir þeirra og brotavilji eru dómgreindinni yfirsterkari.

Í þættinum Málinu á Skjáeinum í gærkvöldi játaði karlmaður á sjötugsaldri fyrir Sölva Tryggvasyni sjónvarpsmanni að hafa átt í kynferðislegu sambandi við ungar stúlkur. Sölvi komst í samband við manninn við undirbúning þáttarins undir þeim formerkjum að hann væri 12 ára stúlka, á nákvæmlega sama tíma og umfjöllun fjölmiðla um barnaníð náði hámarki fyrr í þessum mánuði. Í þessum samskiptum, sem fóru fram í gegnum forritið MSN Messenger, hafði maðurinn deilt mynd af íslenskri stúlku í kynferðislegum stellingum.

Í viðtali sem maðurinn veitti eftir að hann var afhjúpaður greindi hann frá því að hann hefði fengið myndina hjá öðrum manni með sömu hneigðir sem kallar sig „Gunnar." Og lýsti honum m.a svona: „Hann hafði eitthvað sérstakt lag á að komast í kynni við svona ungar stúlkur sem voru í Hagaskóla."

Þar sem fram komu sterkar vísbendingar um kynferðisbrot í þættinum og í raun sýnileg sönnunargögn um slík brot hóf lögreglan á höfuðborgarsvæðinu rannsókn á málinu eftir sýningu þáttarins í gær.

„Við erum þegar komnir með upplýsingar og ég hef haft samband við skólastjórann í Hagaskóla og gert henni grein fyrir því að við komum til með að rannsaka þetta mál," segir Björgvin Björgvinsson, yfirmaður kynferðisbrotadeildar lögreglunnar á höfuðborgarsvæðinu. Hann segir að margir foreldrar barna í Hagaskóla hafi fyllst óhug vegna málsins. „Skólastjórinn tjáði mér í morgun að þetta hefði vakið töluverðan óróa sem er skiljanlegt. Þannig að við komum til með að skoða þetta frá öllum hliðum," segir Björgvin. S. Ingibjörg Jósefsdóttir, skólastjóri Hagaskóla, sagði í samtali við fréttastofu að eðlilega væru foreldrar slegnir óhug og sagðist vonast til að lögreglan upplýsti málið vel og örugglega. thorbjorn@stod2.is