Rannsaka harða diska í tölvum meintra níðinga

Lögreglan á höfuðborgarsvæðinu rannsakar nú harða diska í tölvum tveggja manna sem grunaðir eru um barnaníð. Mennirnir voru handteknir í gær en rannsókn á máli þeirra hófst eftir sýningu þáttarins Málsins á Skjáeinum. Mönnunum var sleppt síðdegis í dag eftir skýrslutökur hjá lögreglu. Ekki var tilefni til að krefjast gæsluvarðhalds þar sem ekki liggja fyrir kærur frá þolendum.

Undir þeim formerkjum að hann væri 12 ára stúlka komst Sölvi Tryggvason í kynni við mann á sjötugsaldri við undirbúning Málsins en umfjöllunarefnið var barnaníð. Maðurinn sýndi kynferðislegu samneyti við „stúlkuna" áhuga og í þeirra samskiptum á netinu deildi maðurinn mynd af ungri stúlku, sem hann kvað íslenska, í kynferðislegum stellingum. Maðurinn sagðist hafa fengið myndina hjá vini sínum sem hann sagði einstakt lag hafa á að koma sér í samband við „ungar stúlkur í Hagaskóla."

Í fréttum okkar í gær staðfesti Björgvin Björgvinsson, yfirmaður kynferðisbrotadeildar lögreglunnar, svo að rannsókn á meintum brotum mannanna væri hafin.

Framvindan var hröð í kjölfarið og voru báðir mennirnir handteknir í gær. Annar þeirra mun hafa verið við vinnu þegar það gerðist. Mennirnir voru svo báðir í skýrslutökum í dag í sitt hvoru lagi hjá kynferðisbrotadeild lögreglunnar á höfuðborgarsvæðinu.

„Mennirnir voru handteknir í gær og voru þá í yfirheyrslum. Auk þess var lagt hald á tölvur og tölvuhluti. Þeir hafa verið áfram í skýrslutökum í dag. Það hefur ekki verið talin ástæða til að fara fram á gæsluvarðhald," segir Björgvin Björgvinsson, yfirmaður kynferðisbrotadeildar LRH.

Eiga þeir sér einhvern sakarferil þegar kynferðisbrot eru annars vegar? „Nei, þeir hafa enga sögu hjá lögreglu."

Eru einhver tengsl á milli þeirra að því undanskildu að þeir hafa verið í samskiptum á netinu? „Nei, það er ekki hægt að sjá að það séu nein tengsl," segir Björgvin.

Mennirnir eru báðir kvæntir og eiga börn. Sá eldri, sem var viðmælandi Sölva í Málinu, á einnig barnabörn. Engar kærur hafa borist frá foreldrum og engir staðfestir þolendur hafa stigið fram og því eru ekki efni til að krefjast gæsluvarðhalds, en lögreglan mun nú yfirfara harða diska á tölvum mannanna og eftir atvikum kalla þá aftur í skýrslu ef þar finnst eitthvað saknæmt.thorbjorn@stod2.is