Eric Idle mætir í Þjóðleikhúsið

Leikarinn Eric Idle, meðlimur breska grínhópsins Monty Python og höfundur söngleiksins vinsæla Spamalot, verður viðstaddur frumsýningu hans í Þjóðleikhúsinu í febrúar.

„Við fengum sýningarréttinn og hann var bara strax spenntur að koma. Hann sagði strax að hann ætlaði ekki að missa af þessu,“ segir Sigurlaug Þorsteinsdóttir, markaðsstjóri Þjóðleikhússins, um komu Idle til landsins. „Við eigum von á honum hressum og kannski tekur hann vini sína með.“

Aðspurð segir Sigurlaug mikla eftirvæntingu eftir söngleiknum. „Það er gaman að sýna eitthvað sem er költ í kringum eins og Monty Python. Það er ekki mjög algengt að mikið af körlum sé að velta fyrir sér að fara í leikhús. Þeir fara yfirleitt þegar konurnar eru búnar að kaupa miða. En þetta er að tala til þeirra og maður finnur það.“

Formlegar æfingar á Spamalot hefjast í byrjun janúar. Með aðalhlutverk fara Örn Árnason, Selma Björnsdóttir, Jóhannes Haukur Jóhannesson, Eggert Þorleifsson og Ágústa Eva Erlendsdóttir.