„Það var fólk á listanum sem ég taldi vini mína“

Kastljósið sýndi í kvöld viðtal við Guðnýju Jónu Kristjánsdóttur, 31 árs gamla konu sem upplifði það fyrir þrettán árum að stór hópur fólks snerist gegn henni þegar hún kærði nauðgun sem hún varð fyrir.

Nauðgunin átti sér stað eftir próflokafögnuð nemenda á fyrsta ári í Framhaldsskólanum á Húsavík vorið 1999 og ári síðar var maðurinn sakfelldur í Hæstarétti Íslands sem komst að sömu niðurstöðu og héraðsdómur Norðurlands eystra hafði gert áður.

Eftir niðurstöðu héraðsdóms birti fjölmennur hópur Húsvíkinga opinbera yfirlýsingu þar sem stuðningi var lýst yfir manninn sem nauðgaði Guðnýju, en niðurstöðu dómsins taldi fólk vera ranga.

„Ég skildi ekki hvers vegna fólk sem var ekki á staðnum hafði skoðun á því hvort mér var nauðgað eða ekki, og þá hvort ég ætti að kæra eða ekki," segir Guðný, en Kastljós segir 113 Húsvíkinga á öllum aldri hafa skrifað undir. Rætt var við rúmlega helming þeirra fyrir þátt kvöldsins og segist einungis lítill hópur segist nú þrettán árum síðar standa við yfirlýsingar sínar. Flestir sögðust hafa gert mistök og tekið þátt í múgæsingu eða talið sig vera að styðja við fjölskyldu mannsins án þess að vera að taka afstöðu til brotsins.

„Mér fannst þetta brútalt eitt og sér að ganga á milli húsa og safna undirskriftum og ennþá meira brútalt að birta hann opinberlega. Það var fólk á þessum lista sem ég taldi vera vini mína og það var sárt."

Guðný segist efast um að hún hefði kært nauðgunina hefði hún vitað hver viðbrögð bæjarbúa yrðu. Þá segir Guðný hafa verið ýjað að því við sig að draga kæruna til baka, og nefnir hún „prestinn á Húsavík" í því samhengi. Sighvatur Karlsson er enn starfandi sóknarprestur á Húsavík og bar við þagnarskyldu spurður út í þessi orð Guðnýjar.

Viðtalið í heild sinni má nálgast á vef Ríkissjónvarpsins.