Grunaður um að hafa orðið fimm mánaða barni að bana

Karlmaður á þrítugsaldri var í fyrradag úrskurðaður í vikulangt gæsluvarðhald í tengslum við rannsókn lögreglunnar á höfuðborgarsvæðinu á andláti stúlkubarns í austurborg Reykjavíkur.

Stúlkan, sem var fimm mánaða gömul, var flutt með sjúkrabíl á Landspítalann á sunnudagskvöld, en lést þar aðfaranótt mánudags. Bráðabirgðaniðurstaða réttarlæknisfræðilegrar rannsóknar bendir til að dánarorsök hafi verið blæðingar í heila, segir í tilkynningu frá lögreglunni.

Maðurinn, sem er í haldi lögreglu, er faðir stúlkunnar og í sambúð með móður hennar. Ekki er unnt að veita frekari upplýsingar um málið.