Lögreglumenn kvörtuðu undan þingmönnum

Nokkrir þingmenn, sem studdu Búsáhaldabyltinguna, sáu sér leik á borði með því að rekast í lögreglumenn sem lágu örþreyttur á gólfum Alþingishússins á meðan mótmælin stóðu yfir í ársbyrjun 2009. Frá þessu greinir lögreglumaðurinn Þorvaldur Sigmarsson í nýútkominni bók sem ber titilinn Búsáhaldabyltingin.

Í bókinni, sem Stefán Gunnar Sveinsson skrifar, er kafli þar sem andrúmsloftinu 20. janúar 2013 er lýst. Þar segir að lögreglan hafi þetta kvöld handtekið 22 manns fyrir utan þinghúsið. Eftir langa bið og margar ítrekanir hafi tekist að fá samþykki starfsmanna þingsins til þess að hleypa lögreglu inn í viðbyggingu Alþingis með fangana og þurfti íhlutun frá æðstu yfirstjórn lögreglunnar til að tryggja það. Fangarnir voru svo fluttir úr garði Alþingishússins og niður í bílageymslu Alþingishússins.

Í ljósi ástandsins úti varð viðbygging Alþingishússins að skjóli þeirra lögreglumanna sem stóðu vaktina. Þeir mötuðust þar og hvíldust á millil vakta. Þegar mest mæddi á mátti sjá sofandi lögreglumenn um allt rýmið," segir bókarhöfundur. Þá segir hann að ekki hafi allir þingmenn kunnað að meta verndina og hafi greinilega ekki viljað að lögreglumenn væru þar innandyra.

„Maður fór þarna inn að borða og við vorum þannig að við sofnuðum þegar við settumst niður í stigann eða á gólfinu eða hvar sem var. Flestir þingmenn, þeir bara brostu og löbbuðu yfir okkur og höfðu lágt, en aðrir sáu sér næstum því leik á borði að rekast í okkur. Þetta var svona viðmótið sem við fengum frá þeim," segir Þorvaldur Sigmarsson í viðtali við bókarhöfund.

Geir Jón Þórisson, sem var yfirlögregluþjónn á höfuðborgarsvæðinu á þessum tíma, segir í samtali við Vísi að sér finnist bókin mjög góð. „Ég endurlifi tímana alveg við að lesa þetta," segir Geir Jón í samtali við Vísi

Geir Jón segir að lögreglumenn hafi sagt sér að þingmenn hefðu látið þá finna fyrir því að þeir væru ekkert ánægðir með lögreglumenn þarna í þinghúsinu. Lögreglumenn hafi beinlínis fundið fyrir ónotum frá tilteknum þingmönnum „Þeir voru beinlínis sárir því það voru þingverðir og starfsmenn þingsins sem buðu lögreglumönnum að nota skálann eins og hann er kallaður," segir Geir Jón.