Nemi fór í mál við FH og Saga film - þarf að borga 700 þúsund

Fimleikafélag Hafnarfjarðar og Saga Film voru sýknuð í Héraðdómi Reykjaness í dag af kröfum manns sem slasaðist í á knattspyrnuleik í Kaplakrika árið 2007.

Maðurinn kveður málavexti vera þá að hann hafi slasast á heimavelli FH, Kaplakrika, þar sem hann var staddur sem áhorfandi á knattspyrnuleik. Fyrir dómi sagði hann að margmenni hafi verið á vellinum og erfitt hafi verið að fá stæði. Leikurinn hafi farið fram í beinni útsendingu og hafi tökulið á vegum Saga film verið með tæki og tól á staðnum. Meðal þeirra tækja hafi verið sérstakur útsendingarvagn, sem komið hafi verið fyrir á vellinum við áhorfendastúkuna.

Þegar hann var á leiðinni af fellinum hafi mikil þvaga myndast við útsendingarvagninn, sem hafi hindrað eðlilega för um svæðið. Hann hafi því ákveðið að víkja til hliðar og stigið upp í tröppur sem lágu upp í útsendingarvagninn, til þess að komast framhjá margmergðinni. Í sama bili hafi hurð á bílnum skyndilega opnast með þeim afleiðingum að maðurinn kastaðist aftur fyrir sig og niður á malbikið fyrir neðan. Fallið hafi verið töluvert. Maðurinn segir að engar aðvaranir hafi verið á bílnum.

Við skoðun hjá lækni var hann greindur með brot á 4. brjósthryggjarlið, talsverða verki í brjósthryga og stífa og auma vöðva þar í kring. Mat bæklunarskurðlæknis er að þessir áverkar hái honum í daglegu starfi. Þá kom einnig fram í bréfi læknisins að hann hafi flosnað upp úr smíðanámi og þurft að hætta vinnu sinni sem smiður. Einkennin hafi valdið honum margra mánaða óvinnufærni.

Maðurinn fór fram á tæplega 3,5 milljónir í miskabætur vegna slyssins.

Dómari féllst ekki á kröfur mannsins og sýknaði FH og Sagafilm meðal annars á þeirri niðurstöðu að ekki séu næg efni til að líta svo á að slys mannsins megi rekja til gáleysis FH og Sagafilm, né starfsmanna þess.

Slysið hafi verið óhappatilviljun eða óvarkárni mannsins.

Manninum var gert að greiða 700 þúsund í málskostnað.

Dóminn má lesa hér.