"Forsetinn samkvæmum sjálfum sér ef hann neitar að skrifa undir lögin"

Forseti Íslands á erfiða ákvörðun fyrir höndum um hvort hann eigi að staðfesta lög um breytingar á veiðigjöldum eða ekki, segir prófessor í stjórnmálafræði. Hann telur þó að Ólafur Ragnar væri samkvæmur sjálfum sér ef að hann neitaði að skrifa undir lögin.

Alþingi samþykkti á fimmtudaginn lög um breytingar á veiðigjöldum og verða þau send forsetanum til staðfestingar á næstu dögum. Tæplega 35 þúsund manns skrifuðu undir áskorun þess efnis að hann synji lögunum staðfestingar og fékk Ólafur Ragnar listann í gær. Ætla má að forsetinn liggi nú undir feldi og hugsi hvaða skref skuli taka.

Eiríkur Bergmann, prófessor í stjórnmálafræði segir forsetann í mjög flókinni stöðu og samkvæmt hefðbundnum skilningi 26.grein stjórnarskrárinnar sé ólíklegt að hann neiti að skrifa undir lögin.

"Hinsvegar hefur hann áður farið gegn hefðum og venjum hvað varðar forsetaembættið. Hann synjaði Icesave-lögunum sem halda mætti fram að væru erfiðari í þjóðaratkvæðagreiðslu þar sem þar er um þjóðréttarsamning er að ræða. Þannig að samkvæmt hans eigin gjörðum áður fyrr er í sjálfu sér ekkert sem útilokar það að hann geti ekki synjað þessum lögum líka staðfestingar."

Eiríkur segir það vissulega skipta máli hversu margir skrifuðu undir áskorunina.

"Jú, að sjálfsögðu skiptir það mjög miklu máli því hann hafði sjálfur sett það fram sem lykilatriði í ákvörðun sinni í fjölmiðlamálinu til að mynda."

Eiríkur telur að spá megi fyrir um ákvörðun Ólafs í ljósi þess hvaða ríkisstjórn er nú við völd.

"Það hlýtur að koma til álita hjá honum að það geti verið erfitt fyrir hann, sem nánast guðföður þessarar ríkisstjórnar, að ganga gegn grundvallaratriði, því fyrsta sem þessi stjórn leggur fram eftir að hafa tekið við völdum. Að það geti verið erfitt að fara gegn stjórninni svo skömmu eftir valdatökum þeirrar stjórnar sem hann hafði jú eiginlega valið, segir Eiríkur Bergmann.