Sindri og Sveppi stökkva yfir Klambratúni í dag

Sjónvarpsmennirnir Sindri Sindrason og Sveppi ætla að stökkva úr fallhlíf yfir Klambratúni í dag. Þeir ætla sér að lenda á túninu klukkan 16. Sindri skoraði á Sveppa að fylgja sér í stökki en þeir ætla að taka uppátækið upp fyrir innslag í Íslandi í dag sem verður sýnt annað kvöld.

Tilefnið er frumsýning skemmtiþáttarins Evrópska draumsins á Stöð 2 á föstudag. Þar eru í aðalhlutverki æringjarnir Sveppi, Pétur Jóhann, Auðunn Blöndal og Steindi Jr. Í þáttunum þeysast þeir félagar um Evrópu og keppast um að safna stigum með því að leysa skemmtilegar þrautir, allt í senn fyndnar, vandræðalegar, erfiðar og háskalegar.

Auddi og Steindi fengu meðal annars það verkefni að fara í fallhlífarstökk. Þeir eru andstæðingar Sveppa og Péturs Jóhanns í þættinum og að sjálfsögðu vill Sveppi sýna það og sanna fyrir alþjóð að hann sé engu minni maður.

Stöð 2, Evrópski draumurinn og Ísland í dag hvetja fólk til að kíkja við á Klambratúni í dag og taka á móti þessum miklu ofurhugum þegar þeir lenda.



Uppfært kl. 16.20: Því miður þurfti að fresta stökkinu en það er áætlað á morgun.