Hannar púða og sessur sem fylltar eru með heyi

Fabio Del Percio flutti til Íslands ásamt konu sinni, Önnu Giudice, eftir að hafa heimsótt landið nokkrum sinnum. Hjónin hanna sessur og "grjóna"púða sem fyllt er með íslensku heyi auk þess sem þau selja ítalska hönnun í verslun sinni í Bergstaðastrætinu.

Að sögn Fabio reka forvitnir vegfarendur oft nefið inn á vinnustofu þeirra hjóna til að komast að því hvað þau eru að framleiða úr heyinu. Hugmyndina að sessunum og púðunum segist hann hafa fengið frá uppeldisárum sínum á ítölskum sveitabæ.

„Ég byrjaði að hanna fyrir um tuttugu árum síðan á Ítalíu og vann einnig um hríð sem bólstrari. Hugmyndin um að nota hey sem fyllingu er komin frá uppeldisárum mínum á Ítalíu en ég ólst upp á sveitabæ og í gamla daga var hey gjarnan notað í dýnur,? segir Fabio og bætir við: ?En útlit púðanna er innblásið af Íslandi.“

Tvö ár eru síðan Fabio byrjaði að þróa hugmyndina að púðunum en hann kaupir heyið frá sauðfjárbónda á Reykjanesinu. Inntur eftir því hvort það hafi komið umræddum bónda á óvart í hvað heyið væri notað segir Fabio svo vera. „Hann varð svolítið hissa á bóninni og rak upp stór augu þegar hann sá vöruna.“

Í áklæðið notar Fabio annaðhvort vínyl eða endurunnið plast og því henta húsgögnin vel í garða eða á svalir þar sem þau eru vatnsheld. Að auki má greina lyktina af heyinu í gegnum áklæðið og því mætti segja að Fabio og Anna færi fólki svolítið af sveitinni heim í stofu. Hjónin eru alflutt til landsins og kveðst Fabio ánægður með lífið á Íslandi. „Við erum komin til að vera og erum mjög hrifin af borginni og íslenskri menningu.“

Aðspurður þvertekur hann þó fyrir að íslenskt veðurfar sé of kalt fyrir Ítala. Áhugasamir geta skoðað púðana á vefsíðunni hver-design.com. sara@frettabladid.is