Draggkeppni á glæsilegasta sviði landsins

„Það er varla hægt að gera dagskránna veigameiri en síðustu ár því hún er alltaf svo flott. En þetta verður dúndur glamúr og skemmtun í glæsilegasta sal landsins,“ segir listamaðurinn Georg Erlingsson Merritt um Draggkeppni Íslands sem haldin verður í fimmtánda sinn næsta miðvikudag.

Sjálfur tók Georg þátt í keppninni árið 1998 og hefur séð um hana síðan. „Það er ótrúlegt hversu mikið keppnin hefur stækkað og breyst á þessum tíma. Fyrstu árin var hún haldin á litlum búllum en á 10 ára afmælinu fluttum við hana í Loftkastalann og við það varð algjör sprenging,“ segir Georg sem fór þaðan með keppnina í Íslensku óperuna og fylgdi þeim svo yfir í Hörpu í fyrra. Hann segir hugarfar fólks hafa breyst mikið með tímanum og að fólk sé nú orðið meðvitaðara um dragg sem listform.

Níu manns taka þátt í keppninni í ár, fimm stelpur og fjórir strákar. „Það getur hver sem er sótt um að vera með, gay eða straight og á hvaða aldri sem er. Fimmtug hóra gæti þess vegna sótt um,“ segir Georg og hlær. Mikil áhersla er lögð á persónuleikasköpun á sviðinu og mikilvægt að atriði og útlit fari vel saman. „Fólk verður að geta farið út í öfgar en samt verið sannfærandi. Auk þess þarf það að leysa ýmsar þrautir og allan tímann að passa sig að detta ekki úr karakter,“ segir Georg.

Keppnin fer fram í Eldborgarsal Hörpu 8.ágúst og er miðasala hafin. Leynd hvílir yfir því hverjir skipa dómnefndina en leikkonan Ágústa Eva Erlendsdóttir verður kynnir kvöldsins. „Hún er svo skemmtileg, það er aldrei að vita hvað henni dettur í hug að gera af sér svo fólk verður bara að koma og sjá,“ segir Georg kíminn. - trs