Sigrún Ósk gerir þátt um Neyðarlínuna

„Þetta verða átta þættir og fjallað um eitt til tvö mál í hverjum þeirra,“ segir Sigrún Ósk Kristjánsdóttir fréttakona sem mun stjórna íslenskum þáttum um Neyðarlínuna sem verða sýndir á Stöð 2 í haust.

Þættirnir segja fjölbreyttar sögur af fólki sem hefur þurft á aðstoð Neyðarlínunnar að halda. „Ég læt mér ekki detta í hug að biðja fólk um að fara út í nein leikræn tilþrif, en að öðru leyti er þetta svipuð hugmynd og amerísku 911-þættirnir því við notum upptökur af símtölum og svoleiðis,“ segir Sigrún Ósk og á þar við þættina Rescue 911 sem sýndir voru á árunum 1989 til 1996. Þættirnir eru ekki fræðsluþættir en að sögn Sigrúnar fela þeir þó í sér óbeina fræðslu. „Í símtölunum heyrast ráðleggingar neyðarvarða og í sumum þáttum býður fagfólk upp á góð ráð,“ segir hún. Hugmyndin kviknaði fyrst fyrir þremur árum þegar Sigrún vann frétt um Skyndihjálparmann ársins. „Það var ung kona sem var valin það árið og við gerðum mjög veigamikla frétt um hana,“ segir hún en fréttin fékk mikil viðbrögð og sá Sigrún strax að þarna væri komið efni sem hægt væri að gera meira úr.

Enn er pláss fyrir fleiri sögur í þættina og hvetur Sigrún Ósk alla til að senda sér ábendingar á póstfangið sigrunosk@stod2.is. „Mig langar til dæmis að gera einn þátt um mikilvægi þess að kenna börnum númerið, svo ef einhver þekkir dæmi þar sem börn hafa bjargað málunum þá væri sérstaklega gaman að heyra af því,“ segir hún. Helst er hún að leita að málum sem gerst hafa á síðustu tveimur árum þar sem erfitt er að nálgast neyðarlínusímtöl fyrir þann tíma.- trs