Þriggja ára með stórafmæli

„Við spurðum hann bara hvað hann vildi gera í tilefni dagsins og þetta var það sem hann óskaði eftir. Við erum ekki með góðan garð heima hjá okkur og datt því í hug að hægt væri að nýta þetta fallega og skjólsæla svæði undir afmælisveisluna. Hann valdi svo sjálfur tónlistaratriðin," útskýrir Tanya Pollock, móðir hins þriggja ára gamla Francis Mosa sem heldur upp á afmæli sitt í Hjartagarðinum í dag. Foreldrar drengsins skipulögðu í samráði við hann svokallað „block party" og munu sjö tónlistarmenn stíga á stokk í tilefni dagsins.

Foreldrar Mosa, Tanya og Tómas Magnússon, eru í hópi sjálfboðaliða sem hafa tekið Hjartagarðinn upp á sína arma í sumar og unnið hörðum höndum að því að snyrta svæðið, skreyta það og glæða það lífi. Tónlistarmennirnir sem koma fram eiga það sameiginlegt að þekkja Mosa litla vel og munu frændur hans og afi, tónlistarmaðurinn Daniel Pollock, meðal annarra stíga á svið. „Tónlistarfólkið var allt af vilja gert enda eru þetta vinir okkar. Svo er Mosi ofsalega skotinn í Þórunni Antoníu og bað sérstaklega um hana," segir Tanya.

Fjölskyldan verður með kökuboð handa afmælisbarninu áður en útiveislan hefst og að sögn Tönyu er Mosi afskaplega spenntur fyrir deginum. „Hann vill bara fjör og að fá að njóta dagsins með sem flestum. Fólki er velkomið að kíkja af Laugaveginum og njóta tónlistarinnar með okkur." Afmælisveislan hefst klukkan 17 og stendur til 21. Fatamarkaður verður á staðnum og meðal þeirra sem koma fram eru Rósa Birgitta Ísfeld og 7berg. - sm