Harvey Weinstein gestgjafi hjá Evu Maríu

„Það var yndislegt af Harvey að vera gestgjafi opnunarinnar en hann hefur stutt okkur mikið í þessu verkefni," segir Eva María Daníels, kvikmyndaframleiðandi og stofnandi netgallerísins Gallery for the People, sem var með opnun á dögunum í Los Angeles.

Eva María og félagi hennar, Ally Canosa, stofnuðu galleríið fyrr á þessu ári og er það einungis á netinu. Fjórum sinnum á ári er galleríið hins vegar með sýningar þar sem væntanlegum kaupendum gefst tækifæri til að skoða verkin með eigin augum. Síðasta sýning var haldin í Los Angeles í síðustu viku en þær voru svo heppnar að einn stærsti kvikmyndaframleiðandi í Hollywood, Harvey Weinstein, var gestgjafi opnunarinnar. Hann hefur reynst Evu Maríu og Canosa vel eftir að þær opnuðu galleríið og fest kaup á nokkrum verkum.

„Síðan við opnuðum galleríið í mars hefur hann keypt af okkur nokkur verk en opnunin í síðustu viku gekk rosa vel og það var fjölmennt," segir Eva María en hluti af ágóða sýningarinnar rann til félagsins The Art of Elysium. „Það var meiriháttar að fá að styrkja gott málefni í leiðinni en félagið hvetur leikara, listamenn og tónlistarmenn til að sinna og verja tíma sínum með langveikum börnum."

Eva María er að gera það gott sem framleiðandi í borg englanna og með mörg járn í eldinum. Listagalleríið er eins konar hliðarverkefni hjá Evu Maríu en tvær kvikmyndir, þar sem hún er meðframleiðandi, verða frumsýndar í haust: Goats sem skartar David Duchovny og Veru Farmiga í aðalhlutverkum, og What Maisie Knew með Alexander Skarsgård og Julianne Moore.

„Goats fer loksins í kvikmyndahús hér þann 10. ágúst og What Maisie Knew verður sýnd á Toronto-hátíðinni í september. Það er nóg að gera og mörg verkefni í þróun sem of snemmt er að tala um á þessu stigi." -áp