Ein á móti Vísindakirkjunni

Vísindakirkjan er talin leika lykilhlutverk í skilnaði Tom Cruise og Katie Holmes. Cruise er áhrifamaður innan kirkjunnar en Holmes var sögð hafa alltaf verið með fyrirvara gagnvart Vísindakirkjunni og hennar trú.

Katie Holmes kom heimsbyggðinni á óvart er hún sótti um skilnað við Tom Cruise í síðustu viku. Cruise var hér við tökur á Oblivion en hjónin gengu hönd í hönd um miðbæ Reykjavíkur aðeins nokkrum dögum áður er þau fögnuðu bandaríska feðradeginum með sex ára dóttur sinni Suri.

Ljóst er að einn stærsti skilnaður í Hollywood er í vændum enda toppaði Cruise nýlega lista Forbes yfir launahæstu leikara í heimi með rúma 9 milljarða íslenskra króna í tekjur á síðasta ári.

Eins og vera ber keppast fjölmiðlar vestanhafs við að flytja fréttir af skilnaðarmálinu og eru flestir sammála um að Vísindakirkjan leiki lykilhlutverk í ástæðu skilnaðarins. Cruise er áhrifamaður innan kirkjunnar og bæði börn hans, Connor og Isabella, aðhyllast trú Vísindakirkjunnar.

Vefsíðan TMZ segir að Holmes hafi löngum haft fyrirvara fyrir Vísindakirkjunni en hún varð meðlimur árið 2005, stuttu eftir að hún byrjaði að hitta Cruise. Það voru áætlanir Cruise að koma dóttur þeirra, Suri, fyrir í sérstökum búðum kirkjunnar sem settu punktinn yfir i-ið fyrir Holmes. Búðirnar nefnast Sea Organization en þar er börnunum kennt allt um trúnna um borð á báti fjarri fjölskyldum sínum.

Fyrrum meðlimir kirkjunnar segja Holmes nú vera álitna ógn fyrir Vísindakirkjuna þar sem hún veit of mikið um starfsemi hennar í gegnum Cruise. People Magazine fullyrðir að útsendarar kirkjunnar fylgist grannt með hverju fótspori leikkonunnar eftir skilnaðarfréttirnar, sem hefur fyrir vikið aukið öryggisgæslu í kringum sig.

Holmes er kaþólsk og hefur skráð Suri í kaþólskan skóla í New York. Hún sótti um skilnað þar í borg og krefst fulls forræðis yfir barninu.

Vinir leikkonunnar segja hana óttast mest að hljóta sömu örlög og Nicole Kidman er hún skildi við Cruise árið 2001 en þá kusu Connor og Isabella að búa hjá föður sínum og stunda skóla Vísindakirkjunnar og misstu samband við móður sína.



UM VÍSINDAKIRKJUNA

• Stofnuð af rithöfundinum L. Ron Hubbard árið 1953 sem var þekktur fyrir vísindaskáldsögur sínar.
• Leiðtogi er David Miscavige.
• Ekki viðurkennd trú í Frakklandi, Kanada, Þýskalandi og Bretlandi.
• 8 milljónir meðlima, að sögn Vísindakirkjunnar, í 120 löndum.
• Stjörnur innan kirkjunnar auk Cruise eru John Travolta, Lisa Marie Presley og Kirstie Alley.
• Samkvæmt kenningum Vísindakirkjunnar er manneskjan andleg vera eða svokallað þetan. Hugurinn skiptist í rökræna vitund og undirvitund sem er sérlega næm fyrir áföllum og áreiti. Áföllin skilja eftir sig ör, svokölluð engrams, á undirvitundinni sem eru rót vandamála manneskjunnar.