Af Broadway í bíóhús

Söngvamyndin Rock of Ages var frumsýnd í kvikmyndahúsum í gær. Leikstjóri myndarinnar er Adam Shankman, en sá gerði einnig söngvamyndina Hairspray.

Rock of Ages er byggð á samnefndum söngleik er slegið hefur í gegn á Broadway. Líkt og söngleikurinn inniheldur kvikmyndin meðal annars slagara á borð við Waiting For a Girl Like You með sveitinni Foreigner, Can‘t Fight This Feeling með REO Speedwagon og Every Rose Has Its Thorn með Poison. Kvikmyndin gerist í Los Angeles árið 1987 og segir frá barþjóninum og rokksöngvaranum Drew Boley og söngkonunni Sherrie Christian sem bæði eiga sér þann draum að slá í gegn sem söngvarar. Bæði starfa þau á hinum vinsæla skemmti- og tónleikastað The Bourbon Room á Sunset Strip sem er þekktur fyrir að hýsa villta rokktónleika. Eigandi staðarins, Dennis Dupree, sannfærir rokkstjörnuna Stacee Jaxx um að halda eina tónleika á staðnum í þeirri von að græða nóg til að geta borgað skuldir staðarins. Eiginkona borgarstjórans er þó ósátt við þau áform og reynir hvað hún getur til að koma í veg fyrir tónleikana og að fá syndabælinu lokað í eitt skipti fyrir öll.

Tónlistin spilar veigamikið hlutverk í myndinni og má heyra lög með sveitum á borð við Def Leppard, Journey, Poison, Twisted Sister og Foreigner óma þegar persónurnar bresta í söng og því dugði ekkert minna en að ráða söngvara í aðalhlutverk myndarinnar. Diego Andrés González Boneta fer með hlutverk Drew Boyle en sá hefur getið sér gott orð sem söngvari og leikari í heimalandi sínu, Mexíkó.

Þjóðlagasöngkonan og dansarinn Julianne Hough fer með hlutverk Sherrie Christian, en hún fór einnig með aðalhlutverkið í endurgerð kvikmyndarinnar Footloose. Með önnur hlutverk fara Russell Brand, Paul Giamatti, Catherine Zeta-Jones, Mary J. Blige, Malin Åkerman, Alec Baldwin og Tom Cruise sem leikur rokkgoðið Stacee Jaxx.

Þó valinn maður sé í hverju rúmi hefur það ekki forðað myndinni frá slæmri gagnrýni og á vefsíðunni Rottentomatoes.com fær myndin aðeins 42 prósent ferskleikastig. Flestum þykir söguþráðurinn þunnur og leikurinn ósannfærandi og fær Tom Cruise að auki misjafna dóma fyrir hlutverk sitt sem Stacee Jaxx.