Hryllilegur jaðarsöngleikur frumsýndur í kvöld

„Það má kalla þetta jaðarsöngleik," segir Valdimar Jóhannsson, einn meðlimur samstarfsverkefnisins Tickling Death Machine, sem verður frumsýnt á Íslandi í kvöld í Iðnó. Um er að ræða samvinnu dansflokksins Shalala og hljómsveitanna Lazy blood og Reykjavík! sem hefur farið sigurför um heiminn.

„Verkið er blanda af tónleikum, dansi og hálfgerðu leikhúsi. Við leikum okkur með texta og vinnum með ákveðið þema sem er falsspámenn með mismunandi sýn á enda heimsins." Hann segir þau vinna mikið með hrylling og að hljómflutningurinn flakki frá óhugnanlegum barnagælum yfir í kvikmyndatónlist og harðasta rokkið í bransanum.

Þessi sérstæði listaviðburður varð til eftir tónleika á sviðslistahátíðinni Keðju þar sem Valdimar ásamt dansaranum Ernu Hreinsdóttur, sem skipar með honum dúettinn Lazy blood, héldu tónleika með Reykjavík!. Sendiboði frá einni mikilvægustu sviðslistahátíð Evrópu, Kunsten festival des arts í Brussel, kom til þeirra eftir hljómflutninginn og sagði: „Þið verðið að gera verk úr þessu."

Hópurinn tók hvatningunni fagnandi en Valdimar og Erna höfðu lengi ætlað að gera verk sem einblínir á tónleikaformið og kannar þátt áhorfenda. Úr varð að hópurinn sýndi fjórar sýningar fyrir fullu húsi á hátíðinni í Brussel vorið 2010 og þar eftir á annarri í Orléans í Frakklandi. Ævintýrið heldur áfram að Íslandsfrumsýningunni lokinni því sýningin ferðast í haust á hátíðina Kyoto Experiment í Japan.

Hljómsveitirnar gáfu nýverið frá sér smáskífu með lögum jaðarsöngleiksins og er hún fáanleg á tónlistarveitunni gogoyoko. -hþt