Gagnrýnir harðlega ákvörðun um kaup á Umferðarmiðstöðinni

Kjartan Magnússon borgarfulltrúi Sjálfstæðisflokksins gagnrýnir harðlega ákvörðun borgaryfirvalda um að kaupa Umferðarmiðstöðina við Vatnsmýrarveg og svæðið í kring fyrir 445 milljónir króna. Eins og fram kom í síðustu viku stendur til að flytja þangað aðalskiptistöð Strætó og hafa þar miðstöð almenningssamgangna. Umræða um málið fór fram á borgarstjórnarfundi í dag.

„Engin ákvörðun liggur fyrir um það í borgarkerfinu eða hjá Strætó bs. að koma aðalskiptistöð almenningssamgangna fyrir í BSÍ-húsinu," segir Kjartan Magnússon í orðsendingu til fjölmiðla. Þá segir hann ekkert faglegt mat liggja fyrir um hvort BSÍ sé ákjósanlegasti staðurinn í Reykjavík fyrir nýja aðalskiptistöð. Árum saman hafi verið rætt um það á vettvangi borgarstjórnar og Strætó bs. hvar æskilegast væri að koma fyrir nýrri aðalskiptistöð og hafi ýmsir staðir verið nefndir til sögunnar; t.d. Kringlan, Mjóddin, BSÍ og Lækjartorg. Í minnisblaði frá Strætó frá 29. febrúar 2012 hafi komið fram miklar efasemdir um að BSÍ sé heppilegasti staðurinn.

Þá segir Kjartan að það sé ótrúlegt að stefnt skuli að kaupum á BSÍ til að koma þar fyrir skiptistöð án þess að sérfræðilegt mat liggi fyrir. Verðið sé afar hátt miðað við að mikil óvissa ríkir um skipulagslega stöðu lóðarinnar.