Útlitið skiptir nánast jafn miklu máli og maturinn

„Ég lærði húsasmíði á sínum tíma og hef í raun aldrei titlað mig hönnuð – ég bara framkvæmi," segir Leifur Welding sem er í dag einn vinsælasti innanhúshönnuður landsins. Leifur hefur komið að útlitshönnun um tuttugu veitingastaða á landinu og verður ekki uppiskroppa með verkefni í bráð.

„Ég hef alltaf haft mikinn áhuga á hönnun og með námi vann ég hjá fyrirtæki sem hét A. Karlsson. Ég vann í húsgagnadeildinni sem seldi aðallega til veitingastaða og hótela. Viðskiptavinirnir spurðu mig ráða varðandi hitt og þetta og svo vatt þetta upp á sig og allt í einu var ég farinn að hanna heilu kaffihúsin," rifjar Leifur upp. Hann hóf síðar nám við Háskólann á Bifröst og á sama tíma stofnaði hann hönnunarverslunina Saltfélagið ásamt öðrum. Hann seldi hlut sinn í versluninni árið 2007 og hefur síðan þá helgað sig hönnunarstarfinu.

Inntur eftir því hvað þurfi til að veitingastaður virki segir Leifur staðina standa og falla með hugmyndinni á bak við þá. „Ég sest niður með eigendunum og saman vinnum við að grunnhugmynd, svo er hannað utan um hana. Maður hannar í raun utan um reksturinn," útskýrir Leifur og bætir við að umhverfi veitingastaða skipti gesti nú næstum jafn miklu máli og maturinn sjálfur. Að hans sögn hefur mikil breyting orðið á veitingarekstri hér á landi síðustu sjö árin og leggi fólk mikinn metnað í innviði staðanna. „Samkeppnin er orðin svo mikil og þess vegna verða menn að hafa staðina einstaka, bæði í mat og umhverfi."

Þegar Leifur er að lokum spurður að því hvort hann verði aldrei uppiskroppa með hugmyndir er hann fljótur til svars: „Ég hef í það minnsta ekki orðið uppiskroppa ennþá," segir hann hlæjandi. „Ég lifi og hrærist í þessu og þetta er það skemmtilegasta sem ég geri. Ég reyni líka að ferðast mikið til að fá innblástur og til að safna upplifunum."

sara@frettabladid.is