Hollywood-stjörnur fitnessheimsins koma til Íslands

„Þau eru bæði hálfgerðar Hollywood-stjörnur og með milljónir aðdáenda sem fylgjast með þeim í gegnum netið,“ segir kraftajötuninn Hjalti Úrsus um þau Ronnie Coleman og Larissu Reis sem eru væntanleg til landsins í nóvember. Þau koma hingað til að taka þátt í árlegu vörusýningunni Iceland Health and Fitness Expo sem Hjalti stendur fyrir ásamt Fitness Sporti.

Ronnie Coleman er mörgum kunnur, en hann er áttfaldur Herra Olympia og hefur auk þess unnið Arnold Classic-mótið og fjölda annarra. „Þegar Densel Washington og þessir kallar vitna í vaxtarræktarmann í myndum þá er það alltaf Ronnie. Hann er stærsta nafnið í þessum bransa strax á eftir Schwarzenegger sjálfum,“ segir Hjalti og bætir við að hann sé mjög skemmtilegur karakter. „Hann gargar til dæmis oft „lightweight, lightweight“, þegar hann er að lyfta kannski 400 kílóum. Það eru alltaf einhverjir svona stælar í honum,“ segir Hjalti hlæjandi en Coleman er þekktur fyrir þessa stæla sína og skemmtilega frasa.

Larissa Reis er tvímælalaust sú heitasta í bransanum í dag en hún keppir í röð þeirra allra bestu í fitness og er með gríðarlega stóran aðdáendahóp. „Á bloggsíðunum hjá stelpunum sem eru í fitness má vel sjá að hún er mikil fyrirmynd hjá þeim. Hún er rosalega hörð, vöðvuð og flott en samt þannig að konur vilja vera eins og hún því hún er svo glæsileg,“ segir Hjalti. „Hún er alveg ótrúlega vinsæl og ég spái því að hún eigi eftir að enda í Hollywood,“ bætir hann við. Á vörukynningunni mun Larissa bjóða upp á námskeið fyrir stelpur þar sem hún fer með þeim yfir hluti eins og þjálfun og mataræði.

Bæði lenda Ronnie og Larissa á landinu 7. nóvember og hún verður hér í fimm daga en hann í fjóra. Þau verða á sýningunni, sem haldin verður í Íþróttamiðstöðinni Varmá í Mosfellsbæ helgina 10. til 11. nóvember, og gefst fólki þar kostur á að hitta þau að máli, fá hjá þeim eiginhandaráritanir og ná myndum af sér með þeim. „Heilsuiðnaðurinn er orðinn svo rosalega stór hérlendis að það er frábært að geta boðið fólki upp á að komast í kynni við svona stór nöfn,“ segir Hjalti.

tinnaros@frettabladid.is