Hundruðir nota happy hour-app

Heimur snjallsímaeigenda tekur stöðugum framförum og það allra heitasta í dag er smáforrit, eða svokallað app, sem nefnist Reykjavík Appy Hour.

Tímaritið The Reykjavík Grapevine stendur fyrir appinu en í því má finna allar svokallaðar Hamingjustundir, eða Happy Hour, sem boðið er upp á í miðbæ Reykjavíkur. Margir barir og veitingahús bjóða upp á þessar stundir á ákveðnum tímum ákveðna daga og eru drykkir þá á lægra verði en ella.

„Við byrjuðum að taka saman svona lista fyrir blaðið okkar síðasta sumar og svo datt okkur í hug að búa til app fyrir þetta. Við höldum samt áfram að prenta þetta í blaðinu líka,“ segir Páll Hilmarsson, hönnuður hjá Reykjavík Grapevine. Appið kom út 18. júní síðastliðinn og er búið að slá í gegn síðan.

„Ég er ekki með töluna alveg á hreinu en það eru einhver hundruð manns búin að sækja þetta,“ segir hann. Reykjavík Appy Hour er eina appið sem Grapevine hefur gefið út hingað til en Páll segir vel mögulegt að þau verði fleiri með tíð og tíma.

Appið er fáanlegt í alla Android og iPhone síma og er notendum að kostnaðarlausu.- trs