Er maturinn nógu góður fyrir börnin - bæjarstjórinn boðar úttekt

Úttekt verður gerð á matvælum sem börnum og kennurum í grunnskólum Hafnarfjarðar stendur til boða og hefur bæjarstjóra jafnframt verið falið að gera samanburð á fyrirkomulagi mötuneytismála hjá öðrum sveitarfélögum.

Í Fréttablaðinu í gær sagði félag grunnskólakennara í Hafnarfirði bæjarstarfsmönnum vera mismunað varðandi hádegismat, þar sem kennarar þyrftu að bíða í röð með nemendum eftir mat sem miðaður er við bragðlauka barna meðan á bæjarskrifstofunni væri tvíréttaður matseðill alla daga og mun fjölbreyttari en sá sem stendur kennurum til boða.

Guðrún Ágústa Guðmundsdóttir bæjarstjóri sendi bréf til félagsins í fyrradag þar sem aðilar sem tengjast málinu voru boðaðir á fund til að fjalla um fyrirkomulag mötuneytismála í grunnskólum bæjarins og tók bæjarstjórnin undir þau áform í gær.

„Svo bætir bæjarstjórn líka við því að bæjarstjóra sé falið að kalla eftir upplýsingum um fyrirkomulag mötuneytismála almennt í sveitarfélögum," segir Guðrún Ágústa.

Einnig hefur verið ákveðið að láta óháðan aðila gera úttekt á öllum matvælum sem börnum og kennurum í grunnskólum bæjarins stendur til boða en mikil umræða skapaðist í gær eftir að félag grunnskólakennara greindi frá óánægju sinni í fjölmiðlum og veltu margir fyrir sér hvort að maturinn væri hreinlega nægilega góður fyrir börnin.

„Mér skilst nú reyndar að það hafi líka komið svo umræða fram að það væri ekki beint verið að gagnrýna matinn sjálfan heldur þetta fyrikomulag á því hvernig kennarar fara í sama mötuneyti og nemendur og sæki sér mat og þvíumlíkt. En auðvitað skiptir máli að maturinn sé góður og uppfylli öll skilyrði og þá meina ég skilyrði eins og ábendingar Lýðheilsustofnunar og manneldismarkmið og annað slíkt og það er náttúrulega það sem við þurfum að skoða," segir Guðrún Ágústa að lokum.