Matarslagur í Hafnarfirði: "Við erum stolt af matnum okkar“

„Ég fagna umræðu um skólamáltíðirnar," segir Jón Axelsson, framkvæmdastjóri Skólamatar ehf., sem sér um að elda mat fyrir grunnskólanemendur, kennara og bæjarstarfsmenn í Hafnarfirði. Stjórn félags grunnskólakennara í Hafnarfirði er ósátt við ákveðinn tvískinnung sem viðgengst hjá bænum eins og Fréttablaðið greindi frá í dag.

Þar kom fram að starfsfólk á bæjarskrifstofu Hafnarfjarðarbæjar fengju annan mat en kennarar, sem segja hafa þurft að borða skólabjúgu með pakkamús á sama tíma og starfsmenn bæjarskrifstofunnar fengu ávaxtafylltan lambaframpart með sætkartöflusósu og súpu.

Þá gagnrýndu kennarar einnig að þeir þyrftu að láta sér nægja upphitaðan skólamat auk þess sem þeir þyrftu að standa í biðröðum með nemendum á meðan þeir biðu eftir matnum. Kröfðust þeir þess að fá sama mat og aðrir bæjarstarfsmenn og að hann yrði afhentur inni á kennaraskrifstofu.

Jón bendir á að bærinn hafi gert ákveðinn þjónustusamning við fyrirtækið. „Þetta er því spurning um að semja upp á nýtt fyrir kennara," útskýrir Jón. Núna hljóðar samningurinn upp á það að kennarar borði í sama mötuneyti og börnin. Í Fréttablaðinu í dag kom fram að það hefði verið ákveðið á bæjarráðsfundi að fela Guðrúnu Ágústu Guðmundsdóttur bæjarstjóra að ræða við kennara um málið.

Þegar Jón er spurður um þann áfellisdóm, ef svo má að orði komast, varðandi skólamatinn að mati kennara, svarar hann því til að fyrirtækið sé með miðlægt eldhús þar sem maturinn er mismikið eldaður. Hann er þó ávallt fulleldaður í mötuneyti skólans, eins og hann orðar það sjálfur. Meðal annars sé fiskurinn ávallt eldaður frá grunni.

Hann áréttar þó að skilyrði séu ströng og að næringarfræðingur og fleiri sérfræðingar starfi hjá fyrirtækinu og að heilsa barna sé ávallt höfð í forgangi.

„Við erum stolt af gæðum matarins sem við búum til," bætir Jón við. Hann bendir einnig á að börnin fái skólabjúgu annan hvern mánuð og að það sé meinhollt eins og allir vita.