Jón Daði: Fagmennskan meiri en 2010

Jón Daði Böðvarsson, miðjumaður Selfyssinga, er leikmaður 15. umferðar að mati Fréttablaðsins. Jón Daði skoraði tvívegis í 4–2 sigri á Fram en sigurinn var lífsnauðsynlegur í baráttu Sunnlendinga á botni deildarinnar.

Selfyssingar léku einnig í efstu deild, í fyrsta skipti, sumarið 2010. Eftir góða byrjun fataðist liðinu flugið og féll úr deildinni.

„Mér finnst liðið núna töluvert sterkara en 2010. Þá fórum við þetta nánast aðeins á heimamönnum sem virkaði því miður ekki. Reynsluleysi blandaðist inn í það og menn ekki í besta forminu. Nú er meiri fagmennska í liðinu. Við stöndum saman, æfum aukalega og menn hugsa betur um sig," segir Jón Daði sem hefur hlotið mikið lof fyrir sína frammistöðu í sumar. Hann viðurkennir að önnur félög í Pepsi-deildinni hafi sýnt honum áhuga.

„Ég myndi aldrei fara í annað íslenskt félag á miðju tímabili. Mér fyndist það óvirðing og myndi aldrei skipta fyrr en að tímabilinu loknu. Ef áhuginn væri erlendis frá væri ég hins vegar alltaf opinn fyrir því," segir Jón Daði sem á ár eftir af samningi sínum við félagið.

Lið Selfyssinga hefur verið töluvert í umræðunni vegna fjölda útlendinga í herbúðum sínum. Sú umræða hefur ekki farið fram hjá Jóni Daða.

„Við erum ekki að fá bara einhverja leikmenn til okkar. Þetta eru frábærir karakterar og Norðmennirnir eru sem dæmi farnir að tala reiprennandi íslensku. Ég hef fulla trú á að við getum bætt stöðu okkar. Mér finnst Selfossliðið miklu sterkara en við höfum sýnt."

Lið 15. umferðar

Markvörður:

Sigmar Ingi Sigurðarson, Breiðabliki

Varnarmenn:

Matt Garner, ÍBV

Guðmann Þórisson, FH

Almarr Ormarsson, Fram

Miðjumenn:

Rúnar Már Sigurjónsson, Valur

Bjarki Gunnlaugsson, FH

Jóhannes Karl Guðjónsson, ÍA

Jón Daði Böðvarsson, Selfoss

Sóknarmenn:

Víðir Þorvarðarson, ÍBV

Kristinn Freyr Sigurðsson, Valur

Pape Mamadou Faye, Grindavík