Þór/KA getur orðið Íslandsmeistari í kvöld

Sjö félög hafa orðið Íslandsmeistarar í knattspyrnu kvenna en það gæti breyst eftir 16. umferð Pepsi-deildar kvenna í kvöld. Lið Þór/KA á nefnilega möguleika á því að verða Íslandsmeistari í Vestmannaeyjum í kvöld.

Þór/KA heimsækir íBV á sama tíma og nýkrýndir bikarmeistarar Stjörnunnar spila á móti Aftureldingu í Mosfellsbænum. Vinni Þór/KA á sama tíma og Stjarnan tapar stigum þá er Íslandsmeistaratitilinn kominn norður í fyrsta sinn.

Þór/KA er með sex stiga forskot á Stjörnuna þegar þrír leikir eru eftir en ÍBV á enn smá von á titlinum því Eyjakonur eru sjö stigum á eftir toppliði Þór/KA. Eyjaliðið hefur því að miklu að keppa í leiknum en ÍBV vann Þór/KA 4-1 í fyrri leiknum á Akureyri sem er eina tap Þór/KA í deildinni í sumar.

Þór/KA hefur verið afar öflugt á útivöllum en liðið er taplaust í ferðum sínum suður og hefur náð í 19 af 21 stigi í boði í útileikjum sínum. Einu stigin töpuðust í jafntefli við Val á Vodafonevellinum og markatala norðankvenna á útivelli er 21-7.

Leikur ÍBV og Þór/KA hefst klukkan 18.00 en hann verður í beinni útsendingu í opinni dagskrá á Stöð 2 Sport 3 sem og hér inn á Vísi.



Íslandsmeistarar kvenna frá upphafi:

15 sinnum Breiðablik

10 sinnum Valur

6 sinnum KR

4 sinnum FH

3 sinnum ÍA

1 sinni Ármann

1 sinni Stjarnan