Eintómir heimaleikir framundan hjá Eyjamönnum

Pepsi-deild karla fer aftur af stað í kvöld eftir smá hlé þegar leikið var í 16-liða úrslitum Borgunarbikarsins. Fyrsti leikur 9. umferðar fer fram klukkan 17.00 í dag þegar Valsmenn sækja Vestmannaeyinga heim á Hásteinsvöll.

Eyjamenn sjá nú fram á eintóma heimaleiki á næstu vikum sem ætti að getað hjálpð þeim að rífa sig upp töfluna. Þeir hafa ekki leikið heimaleik í deildinni síðan 29. maí (4-1 sigur á Stjörnunni) en framundan eru þrír heimaleikir í röð í Pepsi-deildinni auk bikarleiks á móti KR sem fer einnig fram á Hásteinsvelli.

Eyjamenn mæta Val, Fram og Selfoss í næstu heimaleikjum sínum í Pepsi-deildinni en útileik á móti FH í 10. umferð var seinkað til 26. júlí vegna þátttöku liðanna í Evrópukeppninni.

Eyjaliðið hefur rifið sig upp eftir slaka byrjun. Liðið var án sigurs í fyrstu fimm leikjum sumarsins en hefur nú unnið fimm leiki í röð með markatölunni 19-3 en tveir þessara leikja voru í bikarnum.